Ferðakostnaður fyrstu níu mánuði ársins 2020 fyrir A-hluta Reykjavíkurborgar var 77,5 prósentum lægri en á sama tímabili ársins 2019, eða sem nemur tæpum 79 milljónum króna. Að sama skapi nam lækkun vegna B-hluta um 73 prósentum, tæpum 54 milljónum króna.
Þetta kemur fram í svari fjármála- og áhættustýringarsviðs við fyrirspurn áheyrnarfulltrúa Miðflokksins í borgarstjórn Reykjavíkur sem lagt var fram á fundi borgarráðs í gær.
Fyrir A-hluta voru greiddar tæpar 4,4 milljónir í dagpeninga fyrstu níu mánuði ársins en á sama tíma á síðasta ári námu greiðslur vegna dagpeninga rúmum 20 milljónum króna. Greiðslur vegna fargjalda námu rúmum 8,7 milljónum en í fyrra rúmum 37 milljónum.
Í bókun Vigdísar Hauksdóttur, borgarfulltrúa Miðflokksins, sagði hún að í svarinu birtist stórkostlegar fréttir fyrir útsvarsgreiðendur í Reykjavík.
„Loksins sparnaður. Hér er tillaga mín sem ég hef lagt tvisvar fram í borgarstjórn, og verið felld jafn oft, að draga mjög úr utanferðum að raungerast.“
Kolbrún Baldursdóttir, borgarfulltrúi Flokks fólksins, lagði einnig fram bókun þar sem fram kom að allt of mikið fjármagn á flest öllum sviðum borgarinnar hefði farið í ferðir erlendis undanfarin ár.
„Með COVID lækkar þessi kostnaður eðli málsins samkvæmt nánast niður í ekki neitt,“ sagði Kolbrún sem bætti að lokum við:
„Nú má vænta þess að með reynslu fjarfundatækni þá sé ekki lengur nauðsynlegt fyrir borgarstjóra, borgarfulltrúa eða embættismenn að ferðast erlendis. Það er mat fulltrúa Flokks fólksins að ferðalög á kostnað útsvarsgreiðenda eiga því að vera alger undantekning enda hægt að eiga öll samskipti í gegnum fjarfundabúnað.“
