Svo gæti farið að Brynjar Níelsson, fyrrverandi þingmaður Sjálfstæðisflokksins, taki slaginn með Sjálfstæðisflokknum í næstu borgarstjórnarkosningum. Þetta er meðal þess sem kemur fram í fréttaskýringu Ólafar Skaftadóttur á nýjum viðskiptafréttavef Vísis, Innherja.
Eins og kunnugt er náði Brynjar ekki endurkjöri á þing í þingkosningunum í september en heimildir Innherja herma að hann gæti vel hugsað sér að taka slaginn næsta vor. Þá hafi hann verið hvattur til að taka af skarið.
Brynjar er þó talinn ólíklegur til að fara í toppslaginn heldur gæti hann hugsað sér sæti neðar á listanum. „Sjálfstæðisflokkurinn sé í dauðafæri í borginni, að hans mati,“ segir í fréttaskýringunni.
Hver verður oddviti Sjálfstæðisflokksins er óvíst en Eyþór Arnalds mun að óbreyttu gefa kost á sér til endurkjörs. Þá er Hildur Björnsdóttir, sem skipar 2. sætið á lista Sjálfstæðisflokks í borginni, sögð geta hugsað sér að skora Eyþór á hólm.
Bent er á að áherslur þeirra séu ólíkar; Eyþór tilheyrir íhaldssamari armi flokksins en Hildur hinum frjálslyndari. Heimildir Innherja herma að þeim semji þó vel.
„Áhugavert verður, ef af oddvitaslag milli þeirra verður, að sjá hvar hinn almenni Sjálfstæðismaður stendur í grundvallarspurningum um framtíð Reykjavíkurborgar en þar er helsta aðgreiningin milli borgarfulltrúanna tveggja. Þá mun eflaust skipta flokksmenn máli hvort þeirra telst líklegra til að leiða flokkinn til sigurs og í framhaldinu inn í meirihlutasamstarf.“
Fréttaskýringu Innherja má lesa í heild sinni hér.
