Þórhildur Helga Þorleifsdóttir segir farir sínar ekki sléttar eftir samskipti fjölskyldunnar við útgerðarstjóra Brims en eiginmaður hennar Bogi Theodór Ellertsson hefur verið sjómaður hjá útgerðinni í fleiri ár. Þetta kemur fram í viðtali Fréttablaðsins við Þórhildi.
Bogi hefur lent í röð áfalla á síðustu árum og aldrei látið það hafa áhrif á vinnu sínu. Bogi var síðan nátengdur harmleiknum á Blönduósi í ágúst og missti þar bestu vinkonu sína og var æskuvinur hans fluttur milli heims og helju á sjúkrahús. Í miðjum túr óskaði hann eftir því að fara í land þar sem hann var með öllu óvinnufær en útgerðin neitaði að taka veikindavottorðið gilt þar sem að sögn Þórhildar væri áfall ekki veikindi. Í síðustu viku þegar skipið átti að fara til veiðar að nýju þá var skipstjóranum neitað að hafa Boga í áhöfn að sögn Þórhildar.
Í samtali við Fréttablaðið segir Þórhildur það fráleitt að líta ekki áfall sem veikindi. „Svo það þurfa að vera standa í svona að þurfa hafa áhyggjur af vinnu og afkomu þegar maður er í djúpri sorg.“
Hún var sjálf í áfalli eftir harmleikinn og mætti hún allt öðru viðmóti hjá sínum vinnuveitanda.
„Ég fékk allan skilning, umhyggju og utanumhald en það virðist bara vera núll svoleiðis hjá sjómönnum,“ segir Þórhildur.
„Bogi minn er búinn að vera í fleiri, fleiri ár hjá þessari útgerð og ekki fengið kvartanir undan störfum sínum, eiginlega þveröfugt. Í ólgusjó lífsins hefur Bogi fengið beyglur og brot á sálina en ekki látið mikinn bilbug á sér finna. Alltaf staðið sína plikt og ekki tekið neinn aukafrítúr þrátt fyrir mikinn sjógang í lífinu síðastliðin 7 ár,“ skrifar Þórhildur í færslu en hún gaf Fréttablaðinu leyfi til að fjalla um málið.
Frá árinu 2016 hefur Bogi misst 6 nána ættingja og vini löngu fyrir aldur fram segir Þórhildur þar á meðal 49 ára svila úr krabbameini, 57 ára mág úr heilablóðfalli árið, 56 ára mágkonu úr krabbameini árið 2020, 15 ára barnabarn úr sjálfsvígi í fyrra og 55 ára vinkonu úr krabbameini sama ár.
„Aldrei hefur hann tekið sér aukafrítúr vegna þessara áfalla og reyndar verið út á sjó í helming þessa jarðarfara,“ skrifar Þórhildur en segir síðan í samtali við Fréttablaðið að auðvitað fylgir það starfinu.
„Það er náttúrulega samt bara hans ákvörðun. Það er ekkert útgerðinni að kenna þegar þú ert sjómaður á frystitogara veistu alveg að þú ert mánuð og mánuð,“ segir Þórhildur en síðan kemur áfallið í ágúst.
„Bogi er staddur úti á sjó og fær brotsjó á sálina. Ráðist er inn til nánustu vina okkar hjóna með þeim afleiðingum að besta vinkona Boga deyr og allra besti æskuvinur er fluttur milli heims og helju á gjörgæslu og lengi var tvísýnt um líf hans. Bogi út á sjó og fær áfall, áfall sem er staðfest að tveimur læknum- heimilislækni hans og trúnaðarlækni fyrirtækisins. Í fyrsta sinn í öllum þessum missi óskar hann eftir veikindafríi, enda óvinnufær með öllu vegna líkamlegra einkenna áfalls,“ segir Þórhildur.
Boga tókst að koma sér í land segir Þórhildur enda væntanlega hættulegur sjálfum sér og öðrum við vinnu í þessu ástandi.
„En þegar kom að uppgjöri túrsins, þá komu kaldar kveðjur frá útgerðarstjóranum sem neitaði að taka mark á veikindavottorðinu, áfall væri ekki veikindi og hótaði því að Bogi fengi ekki endurráðningu eftir slipp ef hann færi með málið lengra hjá sjómannafélaginu. Ekki múkk um samúð eða skilning frá þessum stjóra- sem heldur greinilega að sjómenn hafi ekki sál.“
Um mánaðamótin september október hafði Bogi samband við forstjóra Brims að sögn Þórhildar sem gekk strax í það að Bogi fékk túrinn greiddan sem veikindatúr.
„Ekki var hægt að skilja orð forstjórans öðruvísi en að Bogi ætti tryggt pláss um borð eftir slipp, þannig að hann hefur ekkert verið að leita sér að nýju plássi. Í síðustu viku var komið að því að skipið héldi á veiðar á ný- eftir slippinn. Skipstjórinn vill hafa Boga bader áfram og sendir áhafnarlista á útgerðarstjórann. Hvað gerist þá? Útgerðarstjórinn neitar skipstjóranum um að hafa Boga í áhöfn, Bogi bader skal aldrei stíga fæti aftur um borð á Vigra. Útgerðarstjórinn er yfirmaður skipstjórans sem þarf að koma þessum ömurlegu skilaboðum til Boga. „Frábær“ framkoma svona korter í jól hjá móðguðum útgerðarstjóra, sem ég held að hafi hreinlega ekki sál öfugt við alla þá sjómenn sem ég þekki,“ segir Þórhildur.
Hún segir Boga ekkert hafa heyrt frá Brim en hann ræddi við tvo útgerðarmenn á föstudaginn og búinn að fá vinnu. „Hann fer á sjó frá Grindavík eftir áramót. Það er allavega einn skipstjóri búinn að bjóða honum pláss,“ segir Þórhildur.
