Felix Bergsson og Baldur Þórhallsson minnast Eddu Hrafnhildar Björnsdóttur sem lést þann 11. ágúst síðastliðinn. Edda, sem var kennaramenntuð, var meðal annars forstöðumaður Rauðakrosshússins og þá var hún virk í starfi Hinsegin kórsins svo fátt eitt sé nefnt.
„Edda Hrafnhildur kom inn í líf okkar á miklum umbrotatímum í lífi samkynhneigðra á Íslandi rétt fyrir aldamótin. Við kynntumst henni fyrst í Samtakahúsinu á Lindargötu þar sem einstaklega jákvætt viðmót hennar vakti athygli okkar strax í upphafi. Ekki veitti af jákvæðni og gleði í baráttunni fyrir fullum mannréttindum sem oft var erfið. Við vorum á fullu í réttindabaráttunni og höfðum öðlast sjálfstraust eftir að lögin um staðfesta samvist höfðu náð fram að ganga nokkrum árum fyrr,“ segir í grein þeirra Felix og Baldurs sem birt voru á Facebook í dag.
Á þessum tíma voru Hinsegin dagar og gleðigangan að verða til og um þetta leyti starfaði Edda Hrafnhildur hjá Rauða krossinum sem forstöðumaður Rauðakrosshússins.
„[Hún] þekkti vel af eigin raun erfiðleika samkynhneigðra ungmenna sem til hennar leituðu. Edda heillaði okkur með fallegri framkomu. Hún var glæsileg kona og falleg, hrein og bein og skemmtileg og algjörlega með hjartað á réttum stað. Það var alltaf gaman að hitta Eddu Hrafnhildi. Hún sat fyrir svörum á mikilvægum fundum sem við héldum eftir sýningar á Jafningjanum og svaraði spurningum þeirra sem vildu skilja líf samkynhneigðra af þolinmæði og visku. Hún var mikilvægur hlekkur í vinakeðju sem barðist fyrir betra lífi,“ segir meðal annars í greininni.
„Svo tekur lífið yfir eins og gerist og gengur og samverustundum fækkaði. Það var samt alltaf svo gaman að rekast á Eddu Hrafnhildi. Við hittum hana á Hinsegin dögum og við rákumst á hana þegar hún þjónaði á Jómfrúnni,“ segir í grein þeirra Felix og Baldurs sem bæta við að minningar um góða manneskju og vinkonu lifi.
Útför Eddu, sem var fædd árið 1959, fór fram í kyrrþey.
