Fékk afslátt af einbýli í Mosfellsbæ vegna músagangs

Ó­venju­legur dómur féll í Héraðs­dómi Reykja­víkur í vikunni vegna deilna sem spruttu upp vegna fast­eigna­kaupa í Mos­fells­bæ árið 2017.

Kröfur í málinu gengu á víxl: Seljandi eignarinnar, 340 fer­metra ein­býlis­húss, krafðist þess að kaupandi myndi greiða honum 9,8 milljóna króna eftir­stöðvar kaup­verðs en kaupandi krafðist þess að seljandi greiddi honum 14,9 milljónir vegna galla sem voru á fast­eigninni, raka- og myglu­skemmda meðal annars.

Þegar kaup­endur fengu húsið í hendurnar sáu þeir ýmsa galla sem þeir höfðu ekki séð við skoðun. Þá vakti slæmur við­skilnaður strax vakið at­hygli, ó­hreinindi og lausir munir.

„Þá hafi hluti úr botni eld­hús­inn­réttingar gefið sig við skoðun og vakið upp grun­semdir um að eitt­hvað meira væri að. Hafi verið farið með barka­mynda­vél á bak við inn­réttinguna og komið í ljós raki, mygla og músar­hreiður,“ að því er segir í dómi. Þá hafi starra­hreiður verið í þak­rennum og starrarnir komist inn um op á þak­köntum á húsinu.

Í málinu var lagt fram bréf frá arki­tekt sem kaup­endur hússins fengu til að veita ráð­gjöf um að koma húsinu í það horf sem höfundur hússins hafði séð fyrir sér við hönnun þess.

„Segir að við vett­vangs­skoðun í síðara skiptið hafi komið í ljós veru­legir gallar á upp­runa­legri eld­hús­inn­réttingu og er þeim göllum lýst sem bólgnum og lausum botn­plötum skápa, raka í hliðar­stykkjum og sýni­legri sveppa­myndun í nokkrum skápum […] Þá hafi verið ljóst af öllum um­merkjum að þetta á­stand hlyti að hafa varað í nokkurn tíma og mikil ó­lykt hafi verið vegna músa sem höfðu búið um sig í sökklum inn­réttingarinnar.“

Í niður­stöðu dómsins kemur fram að eignin sé um 30 ára gömul og í kaup­samningi hafi komið fram að tími væri kominn á við­hald við húsið. Þá hafi sölu­verð hússins, 77 milljónir króna, sam­ræmst því að um hafi verið að ræða fast­eign sem þyrfti endur­bóta við. Þá er vísað til þess að í kaup­samningi hefði kaupandi sætt sig við á­stand hússins, eins og það var eftir „ítar­lega skoðun“. Var því flestum kröfum kaupanda vísað frá.

Dómari gerði kaupandanum að greiða eftir­stöðvar kaup­verðs, að 659 þúsund krónum undan­skildum. Var húsið ó­í­búðar­hæft í ein­hvern tíma eftir þetta vegna starfa mein­dýra­eyðis og þá þurftu kaup­endur að leigja geymslur fyrir bú­slóð. Er af­slátturinn meðal annars kominn til vegna þess.