„Þetta var mjög duglegur ungur maður sem lagði af stað klukkan sex á morgnana, vann sína vinnu og keyrði svo aftur austur,“ segir Jón Einarsson grasalæknir í viðtali við Mannlíf.
Jón er faðir Einars Jónssonar sem lést þegar húsbíll brann í landi Torfastaða í Grafningi á föstudagskvöld. Einar var fæddur 21. ágúst 1982 og var því 38 ára þegar hann lést.
Sjá einnig: Nafn mannsins sem lést þegar húsbíll brann
Jón minnist sonar síns með hlýju í viðtalinu og segir að Einar hafi verið hans besti vinur. Hann hafi átt marga góða og nána vini sem allir eru í sárum núna.
Jón segir að Einar hafi búið í húsbílnum því hann hafi verið mikið náttúrubarn.
„Einar var í fullri vinnu og sinnti henni af dugnaði,“ segir Jón en Einar var bílasmiður og ók til vinnu í Reykjavík alla morgna og aftur austur að vinnudegi loknum.
„Það er ekki eins og hann hafi búið í einhverjum kofa heldur fullbúnum húsbíl. Hann vildi vera í sveitinni. Hann lifði lífinu mjög eðlilega en vildi bara lifa í sveitinni þar sem honum leið best,“ segir faðir Einars meðal annars í viðtalinu sem má lesa í heild sinni hér.
