„Þetta er sláandi munur. Þetta er nákvæmlega sama vatnið í Mosfellsbæ og í Reykjavík,“ segir Eyþór Arnalds, oddviti Sjálfstæðisflokksins í borgarstjórn og stjórnarmaður í Orkuveitu Reykjavíkur, í Fréttablaðinu í dag.
Þar gagnrýnir hann það að gjaldskrá Hitaveitu Mosfellsbæjar á heitu vatni sé í mörgum tilfellum mun lægri en hjá Veitum. Er almennur taxti 24 prósentum lægri hjá Hitaveitu Mosfellsbæjar og munar um 32 krónum á rúmmetra.
Fram kemur að fast gjald á dag sé lítið eitt hærra en hjá Veitum en verð til gróðurhúsa sé 43% lægra hjá Hitaveitu Mosfellsbæjar og tæpum 15% lægra til sundlauga.
Bent er á það að Hitaveita Mosfellsbæjar hafi gert samning við Orkuveitu Reykjavíkur um að kaupa heitt vatn á heildsöluverði. Verðlagning hjá Veitum byggir á ákvörðunum stjórnar og forsendum um arðsemi.
„Stóra hitaveitufyrirtækið ætti að vera með langhagstæðasta verðið. Ég tel að það sé allt of lítill áhugi hjá Orkuveitunni á að lækka verð til notenda, forgangsmálið er frekar að greiða arð til Reykjavíkurborgar.“
