Eysteinn Þorvaldsson, prófessor í íslenskum bókmenntum, er látinn, 88 ára að aldri. Greint er frá andláti Eysteins í Morgunblaðinu í dag en hann kom víða við á löngum ferli sínum, þá einna helst við kennslu en einnig í fjölmiðlum.
Eysteinn útskrifaðist sem stúdent úr MR árið 1954 og stundaði nám í fjölmiðlafræði við háskólann í Leipzig á sjötta áratug liðinnar aldar. Í kjölfarið starfaði hann sem blaðamaður og fréttastjóri á Þjóðviljanum.
Eysteinn byrjaði snemma að fást við kennslu og starfaði meðal annars við Réttarholtsskóla og Gagnfræðaskóla Garðabæjar. Hann var svo íslenskukennari við MH og Menntaskólann við Tjörnina.
Hann stundaði nám í íslensku og þýsku við Háskóla Íslands með fram kennslu og lauk prófi í íslenskum bókmenntum árið 1977. Hann var kennari og síðar prófessor við Kennaraháskóla Íslands.
Eysteinn skrifaði fjölda ritgerða og bóka, ritstýrði ljóðasöfnum og var ötull þýðandi.
Í Morgunblaðinu kemur einnig fram að Eysteinn hafi stundað glímu og júdó, en hann var einn af frumkvöðlum þeirrar íþróttar hér á landi. Börn Eysteins eru Drífa, Ástráður, Heiður, Oddgeir, Björg og Úlfhildur.
