Ey­dís lenti í klóm svikara og tapaði 240 þúsund krónum

„Ég þarf ein­mitt að flytja aftur og var að skoða íbúð. Þá sá ég hel­vítið aftur,“ segir Ey­dís Ósk Hilmars­dóttir. Ey­dís varaði við svika­hrappi í þó nokkrum Face­book-hópum í gær enda vill hún gjarnan koma í veg fyrir að aðrir lendi í svipuðum sporum og hún.

Ey­dís gekk í gildru svika­hrappsins á síðasta ári þegar hann aug­lýsti íbúð til leigu á höfuð­borgar­svæðinu. Maðurinn, sem sagðist heita Gabriel Pelzer, sagði Ey­dísi að hann ætti íbúð við Austur­brún en sjálfur ætti hann heima í Madrid á Spáni. Dóttir hans, sem hefði verið í námi hér á landi, hefði búið í í­búðinni en hún væri nú laus til leigu.

Var í óþægilegri stöðu

Aug­lýst leigu­verð var 120 þúsund krónur á mánuði auk 120 þúsund króna tryggingu. Til að fá í­búðina þurfti Ey­dís því að reiða fram 240 þúsund krónur sem hún gerði. Ey­dís þarf ein­mitt að finna sér nýja íbúð til leigu og á vafri sínu um leigu­síður í gær kom hún auga á þennan sama mann sem notaði sama net­fang og sömu myndir.

Ey­dís segir að undir venju­legum kring­um­stæðum sé hún ekki mjög auð­trúa, en þegar hún freistaði þess að fá í­búðina leigða á síðasta ári hafi hún verið í erfiðri stöðu. „Ég var í ó­þægi­legri stöðu og pínu ó­þreyju­full. Ég hafði búið með kærastanum mínum í nokkuð langan tíma eftir að við hættum saman og vildi komast út,“ segir hún.

8 ára Labrador-hundur og barnabarn á leiðinni

Úr varð að hún setti sig í sam­band við um­ræddan mann sem bauð henni íbúð við Austur­brún – í sama hverfi og hún vildi helst búa í. Þau hófu tölvu­póst­sam­skipti þar sem maðurinn, Gabriel Pelzer, sagðist ekki komast til Ís­lands til að af­henda henni lyklana að í­búðinni. Hann væri fastur í vinnu og akkúrat á þessum tíma stæði yfir þjálfun nýrra starfs­manna sem hann hefði um­sjón með. Hann væri 58 ára byggingar­verk­fræðingur, ætti 25 ára dóttur sem hefði verið í námi hér á landi, væri hamingju­sam­lega kvæntur og fjöl­skyldan ætti 8 ára Labrador-hund. Þá tók hann fram að hann væri að verða afi.

Þar sem Gabriel sagðist vera fastur á Spáni tjáði hann Ey­dísi að Airbnb þyrfti að vera milli­göngu­aðili vegna við­skiptanna. Það sem Ey­dís vissi ekki var að svika­hrappurinn hafði sett upp vef­síðu sem leit ná­kvæm­lega eins út og Airbnb. „Ef maður skoðar linkinn þá sér maður að þetta er ekki frá Airbnb. Maður fær til­kynningu úr net­fangi sem virðist vera frá Airbnb en er það ekki. Hann býr til heilan heim með feik­síðu,“ segir hún.

Kenndi sjálfri sér um

Ey­dís hafði ekki notað Airbnb áður en á­kvað að treysta manninum, taldi hún að Airbnb væri á­kveðinn öryggis­ventill og þá féll hún fyrir frá­sögn mannsins. Hún milli­færði því fyrir tryggingunni og fyrsta mánuðinum, sam­tals 240 þúsund krónur, sem hún hefur ekki fengið aftur. Að­spurð segist hún ekki hafa kært málið til lög­reglu á sínum tíma en lík­lega hefði hún betur gert það. „Ég var eigin­lega með skottið á milli lappanna og kenndi sjálfri mér um,“ segir hún um á­stæðu þess að hún lagði ekki fram kæru.

Sem fyrr segir virðist sami ein­stak­lingur enn vera á ferðinni á ís­lenskum leigu­síðum. Ey­dís skrifaði færslu í fjöl­margar grúppur í gær þar sem hún hvatti fólk til að falla ekki í sömu gildru og hún. Um­ræddur ein­stak­lingur notaði net­fangið steyer178@hot­ma­il.com og sagðist í um­ræddri aug­lýsingu vera með 2 her­bergja íbúð mið­svæðis í Reykja­vík til leigu.