„Í dag er EuroJackpot potturinn í hæstu hæðum, en það er óhætt að segja að fyrsti vinningur hefur hækkað um rúma fjóra milljarða síðan við fórum að draga tvisvar í viku. Við erum því með allra hæsta pott frá upphafi núna,“ segir Halldóra María Einarsdóttir, markaðsstjóri Íslenskrar getspár, í samtali við Fréttablaðið.
Eins og staðan er núna stefnir fyrsti vinningur í EuroJackpot 16,6 milljarðar. Halldóra bendir hins vegar á að enginn Íslendingur hefur unnið fyrsti vinninginn enn sem komið er.
„Við Íslendingar höfum ekki ennþá unnið fyrsta vinning í EuroJackpot, en við höfum fengið bæði annan og þriðja vinning nokkrum sinnum. Hæst voru það rúmar 130 milljónir sem Íslendingur vann í öðrum vinning,“ segir Halldóra.
Í fyrra vann heppinn Íslendingur tæpa 1,3 milljarða í Vikinglottó. Um er að ræða stærsta vinning sem hefur komið til landsins. Næst hæsti vinningur kom síðan í desember í fyrra upp á rúmlega 438 milljónir, einnig í Vikinglotto.
„Í Vikinglotto hefur fyrsti vinningurinn komið oftar en þrjátíu sinnum til landsins frá því að leikurinn byrjaði, en EuroJackpot er nýjasti leikurinn. Það kemur að því að við fáum þann stóra hingað til landsins,“ segir Halldóra vongóð.
Halldóra segir að þau fylgist ekki sérstaklega með fólki sem vinnur stórt í Lottó. Hún segir að nánast allir kjósi að halda nafnleynd.
„Við í rauninni hittum bara fólk þegar það kemur og sækir vinninginn, við bjóðum vinnings-höfum að þiggja fjármálaráðgjöf sem við mælum með að allir nýti sér. Vinningshafar njóta fullrar nafnleyndar hjá okkur og fylgjumst við ekkert nánar með þeim. Þó hefur komið fyrir að við hittum sömu vinningshafana oftar en einu sinni, en þá eru það þeir sem muna frekar eftir okkur en við þeim, segir Halldóra.
