Svo virðist sem einhverjum þykir að við Íslendingar séum orðnir of værukærir nú þegar þriðja bylgja COVID-19-faraldursins er á fullri ferð. Þetta er að minnsta kosti raunin ef marka má umræður í fjölmennum Facebook-hópi, Kórónuveiran COVID-19, sem telur rúmlega 19 þúsund meðlimi.
Í nýlegri færslu segir ein kona að það fari í taugarnar á henni hvað Íslendingar eru kærulausir á sama tíma og 10-50 manns eru að greinast á degi hverjum með COVID-19. „En nei höldum bara áfram að hafa íþróttamót og mjög fjölmenn partý. Partýin eru engu skárri en að fara á pöbbana,“ segir hún.
Í athugasemdum taka margir undir þetta sjónarmið og sumir furða sig á því af hverju sóttvarnir eru ekki hertar til að fækka smitum. Þá finnst öðrum að þríeykið svokallaða sé einnig orðið of værukært. Aðrir benda á að ábyrgðin verði að liggja hjá fólkinu sjálfu og það verði að passa upp á eigin sóttvarnir. „Þetta er allt undir okkur sjálfum komið […] Hver og einn þarf að passa uppá sóttvarnir.“
Einstaklingur sem segist einmitt hafa gert það og einangrað sig til að forðast smit bendir á að það feli í sér mikla skerðingu. „Einangrun vegna þess að aðrir eru ekki að passa sig og eru að fjölmenna. Það verður alltaf stór hópur sem mun ekki passa sig, þannig að sóttvarnir verður að herða til að ná tökum á þessu!.“
Undanfarna tíu daga hafa 363 smit greinst hér á landi, rúmlega 36 á dag að meðaltali, en hafa ber í huga að inni í þessum tölum er ekki holskeflan sem kom föstudaginn 18. september þegar 75 smit greindust. 551 einstaklingu er nú í einangrun á landinu með COVID-19.
