Helga Vala Helgadóttir, þingmaður Samfylkingarinnar og formaður velferðarnefndar Alþingis, vill fá skýr svör frá stjórnvöldum um stöðu bóluefnamála en hún vill vita hvort Ísland fylgi aðeins Evrópusambandinu eftir varðandi kaup á bóluefni gegn COVID-19.
Í samtali við mbl.is segir Helga Vala að hún hafi mikla trú á ESB en hún vilji fá að vita hvort Íslendingar séu sjálf í viðræðum, líkt og mörg önnur ríki eru að gera.
Hún segir að illa hafi gengið að fá svör frá yfirvöldum í þeim málum og þegar svör hafi komið hafi þau verið misvísandi. Hún greinir frá því að óskað hafi verið eftir því að fundað yrði milli jóla og nýárs en að því hafi verið hafnað.
„En við fengum það loforð frá heilbrigðisráðherra að velgerðarnefnd fengi minnisblað í hendurnar um þessi mál. Ég vænti þess að í því minnisblaði séu skýr svör um ferlið allt og stöðuna framundan,“ sagði Helga Vala í samtali við mbl.is en hún væntir þess að minnisblaðið berist í næstu viku.
„Þó að veiran sé ófyrirsjáanleg þá verðum við að vita hvað stjórnvöld eru að gera.“
