„Endanlegur skaði af COVID-19 mun ekki liggja ljós fyrir, fyrr en eftir fjölda ára. Samanburður á þessum tímapunkti gefur engu að síður skýra niðurstöðu um hvert stefnir,“ segir Jón Magnús Jóhannesson, deildarlæknir á Landspítalanum, í svari á Vísindavefnum.
Jón Magnús er þar spurður hvort COVID-19 sé nokkuð hættulegri en inflúensa.
Í svarinu segir Jón Magnús að heimsfaraldur COVID-19 sé iðulega borinn saman við fyrri heimsfaraldra inflúensu.
„Ef það er gert á þann hátt að leiðrétta fyrir aldri, meðferðarúrræðum og aðstæðum hverju sinni, benda nær öll gögn til þess að COVID-19 sé mun skæðari sjúkdómur en inflúensur sem valdið hafa heimsfaröldrum,“ segir Jón Magnús.
Hann bætir við að hafa þurfi í huga að samanburður á heimsfaraldri sem enn stendur yfir og heimsfaraldri sem er yfirstaðinn sé ómögulegur.
„Ekki er hægt að meta endanlegan fjölda tilfella og dauðsfalla smitsjúkdóms í miðjum faraldri.“
Þegar svarið birtist höfðu tæp 60 milljón tilfelli af COVID-19 verið staðfest og rúmlega 1,4 milljónir dauðsfalla.
„En þar með er ekki öll sagan sögð; báðar tölurnar eru án efa vanmat. Endanlegt mat á skaðsemi fyrri inflúensufaraldra lá ekki fyrir fyrr en mörgum árum eftir að þeim lauk,“ segir hann.
Hann segir einnig að ef litið er til árstíðabundinna faraldra inflúensu sé metið að úr þeim deyi árlega um 250.000 - 650.000 einstaklingar.
„Það er augljóslega langtum lægra en dauðsföll vegna COVID-19, sérstaklega ef við höfum í huga að þau dauðsföll sem þegar hafa orðið eiga sér stað samhliða ströngustu lýðheilsuinngripum síðustu 100 ára. Endanlegur skaði af COVID-19 mun ekki liggja ljós fyrir, fyrr en eftir fjölda ára. Samanburður á þessum tímapunkti gefur engu að síður skýra niðurstöðu um hvert stefnir.“
Í svari sínu segir Jón Magnús að í svari við annarri spurningu, Hver er munurinn á flensu og COVID-19?, sé fjallað sérstaklega um vandann við að bera saman fjölda tilfella og dauðsfalla ólíkra faraldra. Er lesendum sem vilja kynna sér málið betur bent á að lesa það svar.
