Elva Hrönn Hjartardóttir, frambjóðandi til formanns VR, svarar kenningum Frosta Logasonar í færslu á Facebook.
Frosti var í Biítinu á Bylgjunni í morgun en þar sagði hann Elvu koma beint úr smiðju femínistanna Sóleyjar Tómasdóttur og Drífu Snædal og að hún hafi farið fram „fyrir alla femínista landsins“.
Elva segir að allt frá því að hún tilkynnti um framboðið hafi hún verið bendluð við ýmislegt eins og VG og Sjálfstæðisflokkinn en að til þess sé þetta uppáhalds kenningin hennar.
„Ég held ég verði nú að segja að þetta sé uppáhalds kenningin mín til þessa. Ég segi það enn og aftur: Ég er í þessu framboði á mínum eigin forsendum af því að ÉG tók þá ákvörðun sjálf. Ég er fullkomlega fær um að taka eigin ákvarðanir og það eru engin öfl á bak við mig, hvorki fjárhagsleg, pólitísk eða af öðrum toga. En ég hef vissulega fengið heilmikla hvatningu alls staðar að,“ segir Elva og að hún hafi gefið kost á sér því fólki finnist hún eiga erindi í stöðu formanns.
„Af því að allt mitt líf hef ég lagt mig alla fram við að koma vel fram við náungann, tala máli þeirra sem einhverra hluta vegna geta það ekki sjálf og nýta mína forréttindastöðu í lífinu til að vinna í átt að réttlátu samfélagi. Þess vegna býð ég mig fram í formann VR,“ segir Elva.
Atkvæðagreiðslan til formanns og stjórnar VR hófst á miðvikudag og stendur til næsta miðvikudags. Þá kemur í ljós hvort að Ragnar Þór haldi áfram sem formaður eða Elva Hrönn tekur við.
