Hera Björk Þórhallsdóttir, sem er landsmönnum kunn fyrir söng sinn og hrífandi framkomu, er jafnframt löggiltur fasteignasali og starfar sem slíkur. Heru Björk er meira til lista lagt og hefur hún mikinn áhuga á innanhússhönnun sem og arkitektúr. Hún aðstoðar meðal annars viðskiptavini sína að stílsera eignir sínar fyrir sölu sem hefur vakið mikla lukku.
Það eru þó fleiri járn í eldinum sem Hera Björk lumar á. Sjöfn Þórðar heimsækir Heru Björk í HÁS sköpunarsetrið í Síðumúlanum en þar er fjölnota aðsetur sem Hera Björk er búin að hanna og innrétta ásamt stöllum sínum. Þar er Hera Björk búin að gefa gömlum húsgögnum og innréttingum nýtt líf í bland við nýtt og litapalletturnar tóna vel saman við umhverfið.
„Ég elska innanhússhönnun, arkitektúr og sniðugar lausnir,“ segir Hera Björk og hefur ástríðu fyrir því að skapa nýtt útlit. Hera Björk er líka iðin við að gefa gömlum hlutum líf og blanda þeim með nýju.
„Ég er mikið að fara í Góða Hirðinn að finna gersemar og ef vinir mínir eiga einhver dásamleg húsgögn sem þeir ætla að henda þá banna ég þeim það,“ segir Hera Björk og er meðal annars með gamalt sófasett frá vinum sínum Begga og Pacas sem þeir geymdu fyrir hana í þrjú ár í sköpunarsetrinu. Hera er jafnframt með afar gott auga fyrir litavali og litapalletturnar heilla þar sem litirnir Dimmur og Sandur eru í forgrunni. Sjón er sögu ríkari og gaman að sjá hvernig Hera lætur ástríðuna ráða för í sköpun sinni.
Þátturinn Fasteignir & Heimili verður á dagskrá í kvöld klukkan 20.30 og er að jafnan ferskur, fjölbreyttur og með persónulegum blæ.
