Ellý Ármanns, myndlistarkona og fyrrverandi fjölmiðlakona, hefur haft í nógu að snúast að undanförnu í listsköpun sinni og hafa myndir hennar selst eins og heitar lummur.
Ellý og unnusti hennar, Hlynur Sölvi Jakobsson, voru í athyglisverðu viðtali við Sigurlaugu M. Jónasdóttur í þættinum Gestaboð á Rás 1 á dögunum.
Í viðtalinu talar Ellý um listsköpunina og árin í kringum hrunið þegar hún lenti í fjárhagserfiðleikum í kjölfar skilnaðar árið 2007.
„Húsið var skrifað á mig, lánin fóru og veistu ég opnaði ekki umslögin,“ segir hún í viðtalinu en stiklað er á stóru um efni þess á vef RÚV. Svo fór að bankinn hirti húsið og flutti Ellý í lítið herbergi í miðborg Reykjavíkur.
Í viðtalinu segist Ellý hafa kennt sjálfri sér um fyrir að hafa skrifað upp á lánið, farið í stórt hús og geta ekki greitt reikninga. „Mér fannst ég bregðast börnunum og sjálfri mér því það fór allt til helvítis,“ segir Ellý sem telur, eftir á að hyggja, að þessi reynsla hafi komið henni til góða.
„Ég var barin niður en það var það besta sem kom fyrir mig. Ég hefði aldrei kynnst Hlyni ef ég hefði ekki farið í gegnum þetta, ég hefði aldrei byrjað að mála. Núna er ég búin að fá fyrirspurn áður en myndirnar eru þornaðar. Það er draumur listamannsins.“
