„Svona gerist þegar stjórnvöld láta undir hælinn leggjast að þróa lagaumhverfið samhliða þróun samfélagsins,“ segir Elliði Vignisson, bæjarstjóri Ölfuss og fyrrverandi bæjarstjóri Vestmannaeyja, á Facebook-síðu sinni.
Þar deilir hann frétt þess efnis að ÁTVR hafi farið fram á lögbann á hendur vefverslunum sem selja áfengi í smásölu hér á landi til neytenda. Samhliða því er einnig hafinn undirbúningur lögreglukæru vegna starfseminnar.
Elliði segir að áfengislögin séu barn síns tíma og staðreyndin sé sú að áfengir drykkir séu í dag séðir sem almenn neysluvara sem neytendur vilja í senn hafa frelsi til að neyta og frelsi til að versla af þeim sem þeir vilja.
„Hið sama gegnir um veðmálastarfsemi,“ segir Elliði sem „taggar“ Áslaugu Örnu Sigurbjörnsdóttur dómsmálaráðherra í færslu sinni.
„Margir veðja á niðurstöður íþróttaleikja sér til skemmtunar. Þeir vilja frelsi til að velja af hverjum þeir versla slíka þjónustu í stað þess að vera knúnir til að versla við fyrirtæki með einokunarstöðu.“
Elliði segist gera þá kröfu á sinn flokk að hann standi vörð um frelsi og láti af forræðishyggju og fortíðarhugsun um einokun. „Taggar“ hann bæði Bjarna Benediktsson fjármálaráðherra og Þórdísi Kolbrúnu Reykfjörð Gylfadóttur iðnaðar- og ferðamálaráðherra í kjölfarið.
Þá hvetur hann sérstaklega nýja frambjóðendur í prófkjöri Sjálfstæðisflokks, Jarl Sigurgeirsson, Guðrúnu Hafsteinsdóttur, Teit Björn Einarsson og Diljá Mist Einarsdóttur þar á meðal, til að taka þessi mál, sem og önnur frelsismál, upp á sína arma.
