Það er ekki að ástæðulausu að fólk er hvatt til að nota handspritt og tryggja tveggja metra regluna enda er kórónuveiran sem veldur COVID-19 bráðsmitandi. Fjölskylda ein í Svíþjóð komst að raun um þetta enda veiktust allir ellefu í fjölskyldunni af veirunni.
Eins og flestir vita hefur Svíþjóð farið verst út úr faraldrinum af Norðurlöndunum þegar litið er til fjölda smita og dauðsfalla.
Folke Möller, 70 ára, segist í samtali við Aftonbladet vera þakklátur fyrir það að geta varið meiri tíma með börnum sínum og barnabörnum eftir að hafa sigrast á veirunni. Hann var sá fyrsti í umræddri fjölskyldu til að veikjast. Svo veiktist eiginkona hans, Ellinor Backman-Möller, 62 ára. Næst var röðin komin að dóttur þeirra og tengdasyni og svo dætrum þeirra sem eru 6 og 9 ára.
Þar með er ekki öll sagan sögð því annað uppkomið barn þeirra Folke og Ellinor, sonurinn Olov, veiktist af COVID-19. Það gerði eiginkona hans líka og þrjú börn: Vilja, 9 ára, Junie, 7 ára, og Elvin, fimm vikna.
Í samtali við Aftonbledet segir Folke að sem betur fer hafi ekkert þeirra veikst alvarlega þó það hafi vissulega verið sláandi að greinast með veiruna. Hann segir að lokum að Svíar – eins og líklega fleiri – gætu vel passað sig betur.
„Fólk er mjög þétt upp við hvert annað á veitingastöðum og í verslunum. Mín tilfinning er sú að fólk hafi slakað á of snemma,“ segir hann.
