Elísabet Guðmundsdóttir, lýtalæknir sem meðal annars hefur talað gegn ströngum sóttvarnaaðgerðum, neitaði að fara í sýnatöku á landamærunum þegar hún kom til landsins frá Kaupmannahöfn í gær. RÚV greinir frá en Elísabet birti myndbönd á Facebook-síðu sinni þar sem þetta kom meðal annars fram.
Elísabet stóð meðal annars fyrir undirskriftasöfnun ekki alls fyrir löngu þar sem hún krafðist þess að framhaldsskólar yrðu opnaðir aftur og íþróttastarf barna og unglinga myndi hefjast að nýju.
RÚV hefur eftir Rögnvaldi Ólafssyni aðstoðaryfirlögregluþjóni að hann þekki ekki til þessa tiltekna máls sem kom upp í gær. Hann sagði það þó ekki algengt að fólk neiti að fara í sýnatöku eða í sóttkví við komuna til landsins en slík mál fari inn á borð lögreglu.
Í einu myndbandi sem Elísabet birti í gær segir hún að verið sé að fara með hana á lögreglustöðina. Í öðru, sem birt er á vef RÚV, sést þegar hún er komin heim til sín. Hringbraut hefur reynt að ná tali af Elísabetu til að spyrja hana nánar út í málavexti en hún hefur ekki enn veitt viðtal.
Í færslu sem hún birti svo skömmu eftir miðnætti hvatti hún fólk til að mótmæla á Austurvelli.
„Á Strikinu var fólk að undirbúa jólin, spjalla saman, syngja og hlæja. Ekkert barn með grímu og allt skóla og frístundastarf með eðlilegum hætti. Íþróttaviðburðir leyfðir með allt að 500 áhorfendum og ekkert verið að boða að fjölskyldur megi ekki vera saman á jólunum. Hittumst á Austurvelli og krefjumst svara, ekkert nágrannalanda okkar með samskonar reglur og hér hafa verið viðhafðar,“ sagði hún í færslunni.
