Ekki hafa öll börn skilað sér aftur í skólann sem hófst að nýju þann 5.maí, segir Þorsteinn Sæberg, formaður skólastjórafélags Íslands í þættinum 21 í kvöld.
Mikið rof hefur orðið á skólastarfi frá því í mars; verkfall var í sumum skólum og svo breiddist út Covid veiran og nemendurnir sendir heim. Mjög misjafnt er hvernig fjarkennslan gekk, sum staðar vel en á öðrum stöðum voru aðstæður fyrir börnin mjög erfiðar, segir Þorsteinn. „Heilt yfir þá reyndu skólar að viðhalda tengslum við nemendur á þessum sóttkvíartíma“. Fjarkennsla eða heimaverkefni í gegnum tölvu og svo símtöl voru það sem notað var.
„Auðvitað sáu menn strax og við vitum að við höldum ekki út öflugri fjarkennslu fyrir ung börn, það var reynt á eldri stigum grunnskóla víða að fara þá leiðina og gekk bara allsæmilega“, bætir Þorsteinn við.
Biðja um leyfi út skólaárið
Haft er eftir Helga Grímssyni, sviðsstjóra skóla- og frístundasviðs Reykjavíkurborgar í Morgunblaðinu í gær að tugir foreldra í Reykjavík hafi beðið um leyfi fyrir börn sín úr skóla út skólaárið af ótta við smit, þrátt fyrir að skólaskylda sé í landinu.
„Foreldrar geta beðið um leyfi fyrir börn sín á ákveðnum forsendum, við tölum oft um skammtímaleyfi og svo langtímaleyfi frá grunnskóla og oftar en ekki þegar verið er að veita langtímaleyfi þá er það ákveðin heimild frá skyldunámi í ákveðinn tíma og það er ákvörðun sem skólastjórar verða að taka að vel ígrunduðu máli og oftar en ekki er sú ákvörðun tekin í samráði við lækni eða barnavernd eða einhverja aðra því þarna er um mjög sértækar óskir að ræða“, útskýrir Þorsteinn og bendir á að það gangi ekki þannig fyrir sig að foreldrar ákveði einhliða að barnið mæti ekki í skólann en ef það gerist sé haft samband við barnarverndaryfirvöld.
Mega vera heima með vottorði
„Það hafa komið óskir eftir að skólarnir opnuðu um það að foreldrar fái að hafa börnin heima vegna þess að þau þora ekki að senda börnin sín í skólann og eru hrædd við smit“. Aðspurðu hvort slíkt sé nóg til að halda barninu heima frá skólanum segir Þorsteinn að það geti verið næg ástæða ef á heimili eru einhverjir undirliggjandi þættir sem verið er að reyna að vernda og uppá skrift lækna til skólastjóra er með þeim hætti að það er mælst til þess að það verði tekið jákvætt í það, þá er undanþága frá skólavist á ábyrgð foreldranna. Það er ekki þannig að börnin séu þá að fá þjónustu heim frá skólanum“.
Varðandi hvort að auðvelt sé að halda börnunum heima frá skóla, segir Þorsteinn ekki svo vera: „Ef skólastjóri er í einhvejrum vafa um það að veita slíkt leyfi þá getur hann leitað til barnaverndar og óskað aðkomu hennar að slíkum málum og skoðaðar hverjar aðstæður eru“, og vísar þá í tilvik þar sem börn mæta kannski ekki og foreldrarnir ekki fengið neitt formlegt leyfi til að halda þeim heima.
Enn er ekki komin heildarsýn á hve mörg börn er um að ræða sem hafa ekki skilað sér í skólann aftur eða hverjir standa svo illa í náminu og jafnvel andlega að undirbúa þurfi sértæk úrræði fyrir þau í haust. Inna Háskóla Íslands er þó hafin vinna við að kortleggja afleiðingar sóttkvíar á börn og fjölskyldur.
