Jörð heldur áfram að skjálfa á Reykjanesinu og í nágrenni höfuðborgarsvæðisins. Magnús Tumi Guðmundsson, jarðeðlisfræðingur segir ekki hægt að útiloka stærri skjálfta en öflugasti hingað til hefur verið 5,4 að stærð.
Þetta segir Magnús Tumi í samtali við Mbl.is. Hann segir að líklega séu núverandi skjálftar í hæsta lagi miðað við staðsetningu og gerð skjálftanna.
„Þetta er svona nokkurn veginn það sem má búast við. Þeir verða ekki mikið stærri á þessu svæði en það er ekki hægt að útiloka það. Þetta verður eitthvað í þessum dúr.“
Hann segir ástæður þess að svo margir minni skjálftar ríði nú yfir séu þær að plötumótin liggi á ská. „Og þá verður þetta svo flókið. Gossprungurnar eru þarna á milli og þær hafa aðra stefnu en plötumótin og þess vegna erum við að sjá svona marga minni jarðskjálfta.“
Búa að hlutum
Magnús minnir á að mikilvægt er að búa að hlutunum heima fyrir og annars staðar svo þeir fari ekki á flug við jarðskjáltana.
„Við búum á landi þar sem eru jarðskjálftar. Alveg eins og við förum í úlpu á veturna þá er þetta bara partur af því að búa hér að vera viðbúinn því þegar það koma jarðskjálftar. Við eigum öll að hugsa þannig að það geta dottið hlutir yfir okkur.“
