Guðmundur Andri Thorsson, þingmaður Samfylkingarinnar, segir að eitt hafi vakið sérstaka athygli hans þegar hann ferðaðist um landið í sumar.
„Um allt land eru gamlir og sögufrægir staðir sem gengið hafa í endurnýjun lífsdaganna sem hótel. Í sumar gistum við ásamt vinum okkar á slíkum stað og var sögu staðarins sýndum margvíslegur sómi í öllum innréttingum sem var fallega við haldið,“ segir Guðmundur Andri í athyglisverðum pistli á Facebook-síðu sinni.
Hann segir að þjónustan hafi verið afbragðsgóð en notast hafi þurft við ensku í samskiptum sem hann lét sig hafa. Það var þó annað sem vakti ekki síður athygli hans.
„Allar áletranir til gesta voru hins vegar líka á ensku – annaðhvort ekki gert ráð fyrir Íslendingum þarna eða hitt, sem er líklegra, að Íslendingar létu sér enskuna nægja. Eiginlega fannst manni hálfgerður dónaskapur að vera að nota íslensku í okkar hóp.“
Guðmundur ítrekar að þarna hafi öllu verið vel og skemmtilega við haldið, gamli tíminn fengið að anda í gömlum mublum og innréttingum. Íslenska hafi þannig verið hluti af innréttingunum.
„Mér fannst ég sjá framtíðina. Hvernig þetta kann að verða ef við notum ekki íslenskuna í okkar daglega amstri. Íslenskan sem hluti af leiktjöldum gamla tímans en enskan hið raunverulega samskiptamál. Það er ekki aðalatriðið að þykja vænt um íslenskuna, það er ekki aðalatriðið að nota hana „rétt“. Aðalatriðið er að nota hana í öllum aðstæðum þar sem henni verður við komið,“ segir Guðmundur Andri.
Margir taka undir með honum í færslunni og benda á að þessi þróun hafi orðið á undanförnum árum. Bætir Guðmundur við að það sé skiljanlegt að starfsfólk sem kemur til Íslands tímabundið í vinnu tali ekki íslensku. „En hitt er verra þegar allar áletranir miðast við að Íslendingar noti ensku.“
