„Það er óþolandi að á sama tíma og ríkið ver mörg hundruð milljónum í að bæta stöðu íslenskunnar í stafrænu umhverfi - sem er algerlega nauðsynlegt - skuli ferðaþjónustan komast upp með að ýta íslensku algerlega til hliðar.“
Þetta segir Eiríkur Rögnvaldsson, fyrrverandi prófessor í íslensku við Háskóla Íslands, á Facebook-síðu sinni.
Þar gerir Eiríkur umfjöllun RÚV að umtalsefni en í henni var rætt við Bjarnheiði Hallsdóttur, formann Samtaka ferðaþjónustunnar, sem telur að Ísland geti tapað sérstöðu sinni gagnvart ferðamönnum. Bent var á það að þegar farið er um miðborg Reykjavíkur megi sjá að nöfn á fyrirtækjum og verslunum séu það oft á ensku að halda mætti að enska væri aðaltungumál borgarbúa.
Í umfjölluninni var vísað í rannsókn þar sem fram kom að ferðaþjónustan hér á landi teldi að einungis ætti að nota ensku í markaðssetningu. Um ástæður þess að ekki var notuð íslenska svöruðu ferðaþjónustuaðilar að það væri óþarfi.
Eiríkur er ósáttur við þetta og segir að til lengri tíma séum við að gera okkur ákveðinn óleik.
„Fyrir utan það virðingarleysi gagnvart íslenskunni sem í því felst er það sem kann að sparast við þetta örugglega aðeins skammtímagróði. Til lengri tíma hljóta tækifæri ferðaþjónustunnar að felast í því að leggja áherslu á sérstöðu Íslands - ekki bara náttúruna, heldur líka menninguna og ekki síst tungumálið. Þarna er verið að fórna gífurlegum langtímahagsmunum fyrir skammtímagróða - eins og venjulega.“
