Fjölmiðlamaðurinn Eiríkur Jónsson er með COVID-19 en Eiríkur greinir sjálfur frá þessu á vef sínum, eirikurjonsson.is.
Það var á laugardag að hann vaknaði sveittur og kaldur með dynjandi höfuðverk. Hann var kominn með bullandi hita og segist ekki hafa getað stigið í fæturna.
„Vissi strax að þetta væri Covid. Svaf allan laugardaginn í rennandi blautum rúmfötum og hitastig líkamans virtist sveiflast frá frosti í funa. Missti þó aldrei andann. Braggaðist um kvöldið og var kominn í sýnatöku í hádeginu á sunnudag þar sem grunur minn var staðfestur,“ segir Eiríkur.
Eiríkur segir að það skrýtna sé að síðan þá hafi hann ekki kennt sér meins. Hann er nú á fjórða degi í einangrun og kveðst stálsleginn.
Eiríkur segir að engin leið sé að vita með vissu hvaðan smitið kom en sjálfur er hann á því að hann hafi smitast í Breiðholtslauginni. Hann var í lauginni á sunnudeginum í síðustu viku en lauginni var lokað á þriðjudeginum vegna smits sem kom þar upp.
Hér má lesa færslu Eiríks í heild.
