Einari Bárðarsyni, umboðsmanni, almannatengli og lagahöfundi, er ekki skemmt yfir því að Eurovision-söngvakeppnin hafi verið blásin út. Þetta var tilkynnt í gær og er óhætt að segja að Eurovision-aðdáendur um allan heim séu í sárum.
Einar, sem samdi meðal annars lagið Birta sem keppti fyrir Íslands hönd, er með lausn á vandamálinu. Hann hvetur til þess að keppnin fari fram en þó í töluvert breyttri mynd.
„Þetta er alveg skelfileg uppgjöf og augljós forystuvöntun. Þetta er lagakeppni fyrst og síðast. Ljósasjóvið getur beðið milli ára - en lögin liggja fyrir og Evrópa getur kosið mjög hæglega. Á tímum eins og þessu er Eurovision enn meira áríðandi til að þjappa saman mannsandanum og baráttugleðinni,“ segir Einar á Facebook undir þræði fjölmiðlamannsins Reynis Traustasonar.
Reynir er sjálfur þeirrar skoðunar að keppnin geti vel farið fram án þess að vera með beina útsendingu. „Fólk kýs einfaldlega um myndböndin. Það er fínt sjónvarp.“
Aldís Hafsteinsdóttir, bæjarstjóri í Hveragerði, tekur undir með Reyni og Einari. „Nákvæmlega og myndi gleðja íbúa þvers og kruss um álfuna!“
