Einar Sveinbjörnsson, veðurfræðingur sem heldur úti vefnum Blika.is, segir að útlit sé fyrir að komandi janúarmánuður verði heldur tíðindaminni en janúar á árinu sem er að líða – að minnsta kosti veðurfarslega.
Einar hefur farið yfir spákortin og birti hann janúarspá sína á vef Blika.is í gær. Hann bendir á að janúarmánuður sé sá mánuður sem alla jafna býður upp á hvað breytilegast veður. „Í ár 2020 var tíðin í janúar mjög stórskorin með tíðum vetrarstormum. Nú hins vegar er útit fyrir öllu rólegra veður svona heilt yfir þar sem hæðir munu líklega verða ráðandi um veðurlag fremur en lægðirnar,“ segir hann.
Hann segir að ákveðinna breytinga sé að vænta á nýársdag þegar hlánar á landinu og sunnanátt ríkjandi. Þetta veðurfar verður viðvarandi fram á þrettándann en þá kólnar með kuldaskilum úr vestri. Hæð tekur sér bólfestu yfir Grænlandi og gæti gert nokkuð kast þessa daga.
Dagana 11. til 17. janúar er útlit fyrir ríkjandi norðanátt með köldu veðri. Til marks um það verður hitinn að líkindum tveimur til sex stigum undir meðallagi og verður éljagangur áberandi norðan- og norðaustantil en lengst af alveg þurrt sunnantil.
Seinni hluta janúarmánaðar segir Einar að líklega verði enn hæð yfir Grænlandi, hiti áfram undir meðallagi en enn sérlega þurrt og að mestu snjólaust um sunnanvert landið.
Spá Einars má lesa í heild sinni hér.
