„Að neita fólki um að gera tilboð í fasteign eða að þvinga það til viðskiptasamninga við sig til þess að fá að gera kauptilboð í eign hlýtur að teljast alvarlegt brot.“
Þetta segir í grein þeirra Einars G. Harðarsonar, löggilts fasteignasala hjá Kaupstað, og Steinunnar Ýrar Einarsdóttur, markaðsstjóra hjá Kaupstað og nema í löggildingu fasteignasala, sem birtist á Vísi í morgun.
Í grein sinni benda þau á að víða virðist pottur brotinn hjá fasteignasölum í því ástandi sem nú ríkir á fasteignamarkaði.
„Í dag er staðan þannig á fasteignamarkaðinum að eftirspurn eftir eignum er töluverð umfram framboð. Í dag eru um 900 eignir í sölumeðferð á Reykjavíkursvæðinu miðað við um 4000 þegar jafnvægi er á markaði. Nú er því hart barist um að fá eignir í sölumeðferð. Skiljanlega, allir vilja fá sem mest viðskipti til sín. Þá reynir á siðgæði fasteignasala,“ segja þau.
Í grein sinni segja þau að borið hafi á því að fasteignasalar neiti að taka við tilboðum frá væntanlegum kaupendum ef þeim líkar ekki skilyrðin sem kaupendur setja.
„Sumir ganga svo langt að taka ekki við tilboði nema þeir fái eign í sölu hjá sér sem viðkomandi þarf að selja til að geta staðið undir kauptilboði. Þannig þvinga þeir kaupendur til þess að gerast viðskiptavinir hjá sér. Þetta er viðskiptaþvingun sem heftir viðskiptafrelsi fólks og skapar enn frekari ójöfnuð á markaði,“ segja þau og spyrja hvað verður um þá sem eiga ekki eignir. „Fá þeir hugsanlega alls ekki að gera kauptilboð hjá viðkomandi fasteignasala?“
Þau hvetja Neytendastofu og Samkeppniseftirlitið til að skoða þessi mál því þau virðist einungis vera að færast í aukana. Þetta valdi tapi hjá neytendum og hefti eðlilega samkeppni með þvingunum.
„Kaupendum eru ekki bara sett skilyrði um sölu sinna eigna heldur einnig hvaða söluþóknun þeir þurfa að greiða fasteignasalanum fyrir sölu á sinni eign. Einnig er ekki víst að seljandi fái hæsta verðið ef einhver fær ekki að bjóða í eignina.“
Einar og Steinunn benda á að setning nýrra laga um fasteignaviðskipti árið 2015 hafi verið mikið gæfuspor og nú sé flestir í þessari starfsstétt löggiltir fasteignasalar eða nemar í löggildingu.
„Í lögunum er skilgreint hlutverk fasteignasala og óhlutdrægni við að vera milliliður um kaup og sölu fasteigna. Hann á sem sagt að vera hlutlaus milliliður og gæta jafnt að hagsmunum kaupenda og seljenda. Það gefur auga leið að þar geta auðveldlega orðið hagsmuna árekstrar en í flestum tilfellum hefur þetta gengið ágætlega,“ segja þau.
Að endingu benda þau á að efnahagskreppan vegna kórónuveirufaraldursins komi einna verst niður á þeim eignalausu þar sem verðbólgan birtist í eignamyndun. Fasteignaverð hafi hækkað mikið á síðustu mánuðum og því ljóst að sanngirni á fasteignamarkaði hafi veruleg áhrif á jöfnuð í samfélaginu og að ungt fólk geti eignast sína fyrstu eign.
„Þar er ábyrgð fasteignasala mikil. Þeir eru að hlutast til um framtíð fólks, ungs fólks sem ekki á eign og möguleika þeirra á fjárfestingum. Að neita fólki um að gera tilboð í fasteign eða að þvinga það til viðskiptasamninga við sig til þess að fá að gera kauptilboð í eign hlýtur að teljast alvarlegt brot.“
