„Barnaverndarnefnd Reykjavíkur verður að segja af sér,“ segir hæstaréttarlögmaðurinn Einar Gautur Steingrímsson á Facebook-síðu sinni.
Einar Gautur deildi í gær frétt Vísis um að starfsmenn Barnaverndar Reykjavíkur og Barnaverndarnefndar Reykjavíkur hafi verið kærðir til lögreglu fyrir brot á hegningarlögum.
Eru þeir sagðir hafa ítrekað haldið fram ósannindum og rangindum í skýrslum og byggt ákvarðanir sínar á umræddum gögnum. Það er Sara Pálsdóttir sem lagði kæruna fram vegna máls skjólstæðings hennar, konu sem var í fíkniefnaneyslu en hefur tekið sig á.
„Það var allt í einu farið að nota rangar staðhæfingar og ósannar skýrslur til að vista börn umbjóðanda míns utan heimilis,“ sagði Sara en málavextir eru raktir ítarlega í frétt Vísis.
Þetta tiltekna mál virðist ekki vera einsdæmi, en Einar Gautur er reynslumikill lögfræðingur sem hefur verið hæstaréttarlögmaður frá árinu 2000. Sagði Sara einmitt að eftir að hafa átt samtöl við aðra lögmenn gruni hana að málið sé ekki einsdæmi.
Í færslu sinni í dag sagði Einar að Barnaverndarnefnd Reykjavíkur þyrfti að segja af sér. Þegar hann var spurður nánar út í ástæður þess, sagðist hann hafa séð þvílíka lögleysu, valdníðslu og lygar tíðkast þar.
„Þetta fólk verður að fara frá. Mér varð í alvöru ómótt þegar ég sá hvernig menn höguðu sér. Það á að taka á þessu núna en ekki eftir 30 ár eins og hefur tíðkast. Vonandi fara þeir í meiðyrðamál við mig svo hægt sé að rétta um fullyrðingar mínar. Hef enga trú á því að þeir leggi í þá vegferð, því miður.“
