„Ég þoli vel umræðu um störf mín og kveinka mér ekki. Ég tek þó takmarkaðan þátt í þessari umræðu en reyni að verja eðlilega fréttamennsku,“ segir Einar Þorsteinsson, fréttamaður í Kastljósi, sem gagnrýndur var fyrir viðtal við Má Kristjánsson, yfirlækni smitsjúkdómadeildar Landspítalans, í gærkvöldi.
Hringbraut greindi í morgun frá orðaskiptum Einars og Helgu Völu Helgadóttur, þingkonu Samfylkingar, eftir þátt Kastljóss í gærkvöldi. Það er skemmst frá því að segja að þau orðaskipti hafa haldið áfram í morgun eftir að Helga Vala skrifaði aðra færslu um málið.
Helga Vala benti á að hún hefði eitt sinn starfað í fjölmiðlum og þá fengið yfir sig gusur, stundum réttmætar en stundum ómálefnalegar. Hún segist þó verða hugsi þegar gagnrýni á framgöngu fjölmiðlafólks í einstaka viðtali sé kölluð „aftaka“. Engum sé greiði gerður að slá slíkri skjaldborg um fjölmiðlafólk, hvorki fjölmiðlafólki né lýðræðinu.
„Orðaskiptin hafa vægast sagt verið hressandi en auðvitað leynist inn á milli fólk sem fer yfir strikið. Það þekkjum við sem störfum í stjórnmálum líka. Einar Þorsteinsson er reyndur fjölmiðlamaður og ég þykist vita að hann þolir umræðu um störf sín og hafi jafnvel gaman af,“ sagði Helga Vala í morgun.
Einar sagðist þola vel umræðu um störf sín og markmið hans í þeirri umræðu væri að verja eðlilega fréttamennsku. „Prófaðu að lesa kommentin við þessa “málefnalegu gagnrýni” og veltu fyrir þér hvort umræðan er uppbyggileg og skemmtileg aflestrar. Ábyrgðin liggur víða,“ sagði hann og bætti við að færsla Helgu Völu í gærkvöldi, þar sem hún sagðist „bæði orðlaus og rasandi“ hefði verið einföld upphrópun og hneykslun sem var einvörðungu fallin til að særa fram tröll.
„Sem hann gerði. Status sem fælir fjölmiðlamenn frá því að stunda gagnrýna fréttamennsku til að lenda ekki í hakkavélinni. En ég er með þykkan skráp. Kom mér bara á óvart að sjá þetta frá fyrrverandi fjölmiðlakonu. Það kemur líklega hratt móða á fréttagleraugun þegar maður situr á Alþingi.“
