Einar Bárðarson, lagasmiður og almannatengill, segir að Þórdís Kolbrún Reykfjörð Gylfadóttir sé einn allra farsælasti ráðherra þessarar ríkisstjórnar. Honum þykir býsna hart hafa verið gengið fram í máli hennar undanfarna daga.
Mikið hefur verið fjallað um vinkonuhitting Þórdísar á laugardag en á myndum sem dreift var um samfélagsmiðla mátti sjá að tveggja metra reglan var þverbrotin. Þá óskaði fréttastofa RÚV eftir því í gær að Þórdís myndi afhenda afrit af reikningum fyrir þjónustu í heilsulind Hilton Nordica, en Þórdís varð ekki við þeirri beiðni. Vildi fréttastofa fá afritið þar sem hluti hópsins hafði notið sérstakra fríðinda.
Einari þykir illa vegið að Þórdísi og er hún í hans huga öflugasti stjórnmálamaður sinnar kynslóðar.
„Hún hefur leyst farsællega úr flóknum viðfangsefnum síns ráðuneytis og hélt vel á spöðunum í flóknum málum dómsmála-ráðuneytisins þegar hún fékk það óvænt upp í hendurnar á tímabili. Hún gerði mistök, sem kostuðu okkur sem samfélag ekkert. Hún hefur beðist afsökunar á því,“ segir Einar í færslu á Facebook-síðu sinni.
„Mér finnst hér gengið hart að konu yfir máli sem varðar ekki almannahagsmuni. Við erum almennt ekki að kalla eftir kvittunum fyrir miðum á fótboltaleiki, bjórglösum eða hamborgurum hjá karl stjórnmálamönnum þó við sjáum myndir af þeim njóta þess á samfélagsmiðlum. Á sama tíma erum við að glíma við sögulega efnahagslægð, atvinnuleysi sem við höfum ekki séð áður og ríkisábyrgð á stærsta fyrirtækið í hennar málaflokki.“
