Kanada, Danmörk, Finnland, Þýskaland, Frakkland, Ítalía, Belgía, Holland, Indland, Írland og Spánn eru meðal þeirra þjóða sem lokað hafa á nær allar samgöngur frá Bretlandi.
Þetta var gert eftir að bresk yfirvöld tilkynntu um að nýtt afbrigði kórónuveirunnar hefði skotið þar upp kollinum. Margt bendir til þess að þetta afbrigði sé meira smitandi en önnur afbrigði þó það valdi ekki alvarlegri veikindum. Belgía og Holland riðu á vaðið í gærmorgun og síðan þá hafa fjölmörg ríki bæst í hópinn.
Ísland er ekki meðal þeirra þjóða sem hafa lokað á samgöngur frá Bretlandi, en samkvæmt vef Isavia er ein þota Icelandair væntanleg til landsins frá London á Þorláksmessu. Þota frá Easy Jet lenti svo á Keflavíkurflugvelli í morgun.
Túristi segir frá því að níu ferðir Icelandair til viðbótar séu væntanlegar á tímabilinu frá 26. desember til 10. janúar næstkomandi.
Skiptar skoðanir eru um þetta nýja afbrigði en ljóst er að fjölmargar þjóðir ætla ekki að taka neina áhættu. Kári Stefánsson, forstjóri Íslenskrar erfðagreiningar, sagði í fréttum RÚV að ef þetta afbrigði væri smitnæmara en önnur þá væri það mjög lítið. Boris Johnson, forsætisráðherra Bretlands, sagði um helgina að þetta nýja afbrigði væri 70% meira smitandi en önnur.
Þórólfur Guðnason sóttvarnalæknir sagði í fréttum RÚV að óvíst væri hvað Bretar hefðu fyrir sér um að afbrigðið væri meira smitandi.
„Það kann vel að vera en það er ekki komið fram á hverju það er byggt. Það kann vel að vera að þetta tengist hegðun fólks, að það sé að hópast saman og passar sig ekki. Það er lykillinn að dreifingu,“ sagði hann.
