Egill: Þessi vika gæti orðið af­drifa­rík – Keypti frysti­kistu í fyrsta sinn á ævinni í febrúar

Egill Helga­son fjöl­miðla­maður segir að þessi vika gæti orðið af­drifa­rík haldi CO­VID-19 smit á­fram að greinast hér á landi. Fimm­tán innan­lands­smit greindust um helgina og veltir Egill því fyrir sér hvort herða þurfi tak­markanir innan­lands.

Eins og greint var frá á föstu­dag þurfa ferða­menn sem koma til landsins frá og með 19. ágúst að gangast undir tvær skimanir, aðra við komuna til landsins áður en farið er í sótt­kví í 4-5 daga þar til niður­staða úr seinni skimum fæst.

Egill segir að fjölgun smita við landa­mæri sýni okkur að sóttin hafi sótt í sig veðrið í ná­granna­löndum okkar og það eigi líka við um lönd sem við höfum talið örugg og þaðan sem ekki er skimað. Þessi stað­reynd renni stoðum undir á­kvörðun stjórn­valda sem kynnt var á föstu­dag.

Egill viðraði þessar hug­leiðingar sínar á Face­book í gær og hafa yfir 100 at­huga­semdir við skrifaðar við færsluna. Sumum finnst Egill gera of mikið úr málinu en aðrir benda á að veiran sé ekkert lamb að leika sér við.

„Vonum sannar­lega að viti á gott að flestir smitaðir séu i sótt­kví. Næsta vika gæti orðið af­drifa­rík. Skólar eiga að byrja þá en mér sýnist reyndar að sumir bíði fram í þar­næstu viku, amk. Fram­halds­skólar,“ segir í Egill í einni at­huga­semd.

Egill, sem hefur ekki legið á skoðunum sínum varðandi far­aldurinn undan­farna mánuði, var í á­huga­verðu við­tali í helgar­blaði Frétta­blaðsins um helgina. Þar sagðist hann hafa haft vonda til­finningu gagn­vart far­sóttinni þegar hann las fréttir um upp­gang hennar í Kína.

„Í febrúar keypti ég frysti­kistu í fyrsta sinn á ævinni og við birgðum okkur upp af mat og lyfjum. Það var í fyrsta sinn sem ég hef búið mig undir að loka mig af. Sem betur fer reyndist pestin ekki jafn skæð og til dæmis Spænska veikin, en maður þarf samt að beita öllum ráðum til að smitast ekki,“ sagði hann og bætti við að það væri ekki bara dauðinn og veikindi nánustu að­stand­enda sem hann óttast. Heldur einnig lang­varandi af­leiðingar far­sóttarinnar.

Þá sagði hann að einungis harðar að­gerðir dugi til að veikin berist ekki til landsins.

„Ég veit að mörgum vinum mínum finnst ég vera ótta­legur tuðari, ótta­slegið gamal­menni, en mér sýnist að nú séu æ fleiri að komast á mína skoðun,“ sagði hann og bætti við að hann væri þreyttur á frasanum sem stundum heyrist að við þurfum bara að lifa með veirunni.

„Ef landa­mærin eru opin og smit berst stöðugt inn í landið, þýðir það þá að þeir sem eru við­kvæmir séu í ein­hvers konar stofu­fangelsi? Þetta er ansi stór hluti þjóðarinnar. Mér hafa fundist skila­boðin vera ansi loðin undan­farið, en mér sýnist að á­kvarðanir ríkis­stjórnarinnar og sótt­varna­læknis frá því í gær [föstu­dag] séu mjög skyn­sam­legar.“