„Vonum að það sleppi í þetta skipti,“ segir fjölmiðlamaðurinn Egill Helgason á Facebook-síðu sinni. Eins og greint var frá í morgun greindust fjögur kórónuveirusmit innanlands í gær en það er það mesta á einum degi síðan í janúar.
Egill deilir frétt Morgunblaðsins þar sem rætt var við Þórólf Guðnason sóttvarnalækni um málið. Í fréttinni staðfesti hann að smitin fjögur sem greindust í gær tengist landamærasmiti og eru hinir smituðu allir úr sömu fjölskyldunni.
Egill segir að svona geti þetta gerst, farþegi úr millilandaflugi greinist ekki fyrr en í seinni skimun en er þá búinn að smita í kringum sig. „Við megum ekki missa þetta út úr höndunum núna, þegar innanlandssmitin voru komin niður í núll – það yrði skelfilegt áfall. Hætt við að þetta sé uppskrift að nýrri bylgju.“
Þórólfur segir við Morgunblaðið að veikleikar núverandi kerfis tengist landamærunum. Smitaðir einstaklingar virði kannski reglur um sóttkví eða einangrun en deili á sama tíma heimili með öðrum og smiti þannig út frá sér. Mögulegt sé að koma í veg fyrir það með því að skylda fólk í sóttvarnahús þegar það kemur til landsins.
Þess má geta að allir hinir smituðu voru í sóttkví þegar þeir greindust. Alls eru 26 í einangrun hér á landi vegna COVID-19 og 11 á sjúkrahúsi.
