„Þetta er ansi mikið – af ekki miklum fjölda. Verðum að passa að fá ekki þennan fjára inn í landið. Tónninn á þessum fyrsta bólusetningardegi er líka full bjartsýnn,“ segir fjölmiðlamaðurinn Egill Helgason.
Egill deilir á Facebook frétt Morgunblaðsins þar sem greint var frá því að ellefu einstaklingar hefðu greinst með hið svokallaða breska afbrigði COVID-19 á landamærunum skömmu fyrir jól. Alls hafa þrettán greinst með þetta afbrigði hér á landi en það er talið mun meira smitandi en önnur afbrigði veirunnar.
Í dag hófust bólusetningar gegn COVID-19 og eðli málsins samkvæmt er þetta tímamótadagur í baráttunni við veiruna. Öllum ætti þó að vera ljóst að enn er langt í land þar til næst að útrýma veirunni alveg. Agli þykir full mikil bjartsýni ríkja.
„Það er langt þangað til líf kemst í eðlilegt horf. En auðvitað vill fólk líka fá jákvæðar fréttir. En þá má nefna að það væri frábært að sleppa við nýja bylgju eftir öll boðin, verslunina og ferðalögin um hátíðirnar. Það á eftir að koma í ljós.“
Styrmir Gunnarsson, fyrrverandi ritstjóri Morgunblaðsins, gerir þessa bjartsýni líka að umtalsefni á vef sínum, Styrmir.is, í dag.
„Það er ótímabær bjartsýni að líta svo á að samfélagið komist í gang á ný á tiltölulega skömmum tíma. Það á við um virkni samfélagsins hér heima fyrir,“ segir hann meðal annars og nefnir að endurreisnin muni taka tíma.
„En hvort sem um er að ræða komu erlendra ferðamanna hingað eða sölu á sjávarafurðum okkar til annarra landa, sem er forsenda efnahagslegrar endurreisnar hér eftir veiruna, má búast við að það taki lengri tíma. Forsendan fyrir því er víðtæk bólusetning um allan heim. Talsmenn hagsmunaaðila hafa tilhneigingu til að tala af of mikilli bjartsýni, eins og talið eitt breyti einhverju. Svipaðra tilhneiginga gætir í pólitíkinni. Við skulum ganga hægt um gleðinnar dyr,“ segir Styrmir.
