„Kóvíd hefur kennt okkur hverjir vinna mikilvægustu störfin,“ segir sjónvarpsmaðurinn Egill Helgason á Facebook-síðu sinni.
„Hjúkrunarfræðingar, læknar, sjúkraliðar, lögregluþjónar, landamæraverðir, starfsfólk í verslunum, þeir sem sjá um flutninga og vörudreifingu, þeir sem framleiða nauðsynjavöru, mat, lyf og fleira, þeir sem halda uppi samgöngum, kennarar og leikskólakennarar – og svo má telja áfram,“ bætir hann við.
Egill er þeirrar skoðunar að þessir einstaklingar, sem sinna þessum mikilvægu störfum, eigi betra skilið.
„Launastrúktúr samfélagsins er hins vegar ekki í neinu hlutfalli við mikilvægið – eða má jafnvel segja að hann sé í öfugu hlutfall við það í afar mörgum tilvikum.“
Það er óhætt að segja að margir taki undir færslu Egils. Má þar nefna tónlistarmanninn Magnús Þór Sigmundsson. Hann segir: „Ég hef lengi verið þeirrar skoðunar, sá sem gerir við tölvuna mína fær margföld laun á við leikskólakennara, hvort er meira virði tölvan mín eða barnið mitt?“
Þorfinnur Ómarsson leggur einnig orð í belg og segir Egil hafa gleymt einni starfsstétt. „Þú gleymir þinni eigin starfsstétt, sem skiptir líka sköpum á þessum tímum. En þar eru reyndar ekki greidd laun í takt við mikilvægið.“
