Eggert Skúlason, fjölmiðlamaður og fyrrverandi ritstjóri DV, segist vona að nú séum við stödd á krossgötum. Það ofbeldi og hótanir sem íslenskir stjórnmálamenn hafi búið við sé óboðlegt.
„Skotárásir og líflátshótanir. Sú ákvörðun að þegja yfir þessu var klár mistök. Samfélagið þarf að verja sig og það gerist ekki með þögninni. Þekki þetta á eigin skinni,“ segir Eggert í færslu á Facebook-síðu sinni.
„Þann tíma sem ég var ritstjóri DV fékk ég margs konar hótanir um hvernig ætti drepa mig og þá sem stóðu mér næst.“
Eggert var sem kunnugt er ráðinn ritstjóri DV í lok árs 2014 eftir mikið fjaðrafok innan fyrirtækisins. Hann segir í færslu sinni að sennilega hafi skotleyfi verið gefið út daginn sem hann gerðist ritstjóri.
„Bæði RÚV og Stöð 2 sáu ástæðu til þess að spyrja mig hvort ég væri framsóknarmaður. Man ekki eftir að aðrir sem tóku við sambærilegum stöðum hafi þurft að svara slíkum spurningum,“ segir hann og bætir við í athugasemd undir færslunni að hann sé að vísu skráður í Sjálfstæðisflokkinn.
„Ég legg til að stjórnmálamenn - kjörnir fulltrúar byrji á því að taka til í eigin garði og vandi umræðuna og þar með slái ekki þann tón að stjórnleysi og öfgar líðist í okkar umræðu.“
Hannes Hólmsteinn Gissurarson, prófessor í stjórnmálafræði við Háskóla Íslands, leggur orð í belg og segir: „Nei, ég held ekki, að það séu mistök að segja ekki frá þessu. Reynsla lögreglunnar í öllum löndum er, að fólk, sem er tæpt á geðsmunum, fær alls konar hugmyndir við slíkan fréttaflutning.“
Eggert svarar á móti að það geti vel verið en á einhverjum tímapunkti verði að hafa í huga að hótanir af þessu tagi eru lögbrot. „Það má ekki viðgangast að fólk komist upp með þetta. Sumir segja skilum skömminni. Kannski er kominn tími á að skila hræðslunni. Svona hótanir skemma fólk og valda hræðslu.“
