„Ef ég nennti að rifja það upp þá gæti ég ábyggilega munað eftir einhverjum skiptum þar sem mér hefur verið mismunað vegna þess að ég er kvenmaður en ég held að það sem hafi valdið meiru um að ég fékk ekki þau störf sem ég sótti um hafi verið pólitíkin. Ég þótti háskalega vinstrisinnuð á árum áður og embættismenn hvers konar voru gjarnan hræddir við svona komma. Ég kenni því frekar um“, segir Silja Aðalsteinsdóttir bókmenntafræðingur sem er gestur Lindu Blöndal í þættinum Fyrirmyndir á Hringbraut en Silja hefur átt farsælan feril í áratugi og sett mark sitt á menninguna hér á landi.
Ódauðlegt líf bókarinnar
Silja ræðir ódauðlegt líf bókarinnar sem spáð var dauða á árum áður þegar tækninni fleytti fram og lesbretti ruddu sér leið á markaðinn og einnig hvaða tegundir bókmennta eigi endurkomu nú um mundir en það telur hún vera ástarsögur. Hún nefnir sína áhrifavalda í lífinu og minnist Gunnars Karlssonar prófessors í sagnfræði við Háskóla Íslands en hann lést í fyrrahaust og var eiginmaður og lífsförunautur Silju.
Margar viðurkenningar
Silja sem komin er af verkafólki hefur hlotið margvíslegar viðurkenningar fyrir störf sín, sem rithöfundur, ritstjóri og þýðandi.
Silja hlaut Íslensku bókmanntaverðlaunin árið 1995 fyrir bókina Skáldið sem sólin kyssti, ævisögu Guðmundar Böðvarssonar og Íslensku þýðingarverðlaunin fyrir þýðingu sína á Wuthering Heights eftir Emily Brontë árið 2006. Hún hlaut riddarakross Hinnar íslensku fálkaorðu árið 2015 fyrir framlag sitt til íslenskra bókmennta.
Verðlaun Jónasar
Verðlaun Jónasar Hallgrímssonar sem hún hlaut 2005 eru þó henni kærust:
„Þar er maður beinlínis handvalinn úr allri þjóðinni, ekki bara útgefnar bækur eða í einhverjum hópi sem á skilið að fá Fálkaorðuna heldur beinlínis úr öllum fjöldanum. Það fannst mér mikill heiður. Verðlaun kennd við Jónas Hallgrímsson, þarf að segja meir?“
Silja Aðalsteinsdóttir er höfundur fjölda bóka, meðal annars ævisagna og bóka um íslenskar bókmenntir. Meðal bóka hennar eru námsbækurnar Bók af bók sem er sýnisbók íslenskra bókmennta frá siðaskiptum til 1918, ætluð til kennslu í framhaldsskólum og bókin Orð af orði, sem er bókmenntasaga og sýnisbók bókmennta fram til siðaskipta.
Silja var um langt skeið ritstjóri Tímarits Máls og menningar, var ritstjóri Þjóðviljans um skeið og hafði umsjón með menningarefni í DV frá 1996-2003.
Þátturinn er á dagskrá í kvöld, Páskadag Kl.21.30
Um þáttinn Fyrirmyndir
Fyrirmyndir eru nýjir þættir þar sem rætt er við Íslendinga sem hafa lagt meira af mörkum til samfélagsins en gengur og gerist og hlotið opinbera viðurkenningu fyrir.
