Guðni Ágústsson, fyrrverandi landbúnaðarráðherra og formaður Framsóknar, segir Framsókn vera límið í ríkisstjórnarsamstarfinu og samfélaginu. Flokkurinn eigi vinsælustu ráðherrana.
Þetta segir Guðni í pistli sem birtist í Fréttablaðinu í dag. Þar tekur Guðni undir orð Sigmundar Ernis Rúnarssonar, sjónvarpsstjóra Hringbrautar um að Framsókn sé límið. Enginn flokkur hafi staðið betur af sér klofning á síðustu árum í stjórnmálasögu Íslands.
Guðni rifjar upp að Framsókn hafi fjórum sinnum gengið í gegnum alvarlegan klofning. „Fyrst klofnaði hann um Jónas Jónsson frá Hriflu og Tryggva Þórhallsson, og síðan aftur um Jónas frá Hrif lu þegar hann var felldur frá formennsku og Hermann Jónasson tók við. Aftur klofnaði hann um Ólaf Ragnar Grímsson og Möðruvallahreyfinguna 1974 og nú síðast um Sigmund Davíð Gunnlaugsson 2017,“ skrifar Guðni og heldur áfram:
„Allt voru þetta þung högg og spádómar gengu út á að Framsókn myndi seint bera sitt barr. En flokkur sem stendur fast á grundvallarstefnu sinni að hin gullna regla sé vináttan rís alltaf aftur: „Hlustaðu á aðra á sama hátt og þú vilt að aðrir hlusti á þig.“
Vinsælustu ráðherrarnir
Guðni segir það blasa við að flokkurinn geti náð sínum fyrri styrk í kosningunum í haust. Flokkurinn hafi náð mikilli samstöðu um framboðslista sína.
„Verk þeirra Sigurðar, Lilju Daggar og Ásmundar Einars hafa verið sett á mælivog ánægjunnar í Capacent og eru þau öll í hópi þeirra fimm ráðherra sem mest ánægja er með. Mælast í öðru, þriðja og fimmta sæti vinsældanna. Ég spyr svo að lokum, hver vill nú skipta um flokka í ríkisstjórn? Ekki ég, ekki Sigmundur afi, ekki unga fólkið og skynsemin segir Framsókn er límið, flokkurinn sem horfir beint fram. Við Íslendingar erum með landið okkar í einstakri stöðu, þar á Framsókn stóran þátt. Ísland á að vera grænt áfram.“
Pistill Guðna í Fréttablaðinu.
