„Ég mæli ekki með þessu við neinn,“ segir Víðir Reynisson, yfirlögregluþjónn um COVID-19 veikindi sín. Hann var spurður að því á blaðamannafundi almannavarna hvort hann væri enn að jafna sig og sagði svo vera.
Víðir segir að hann hafi ekki enn fengið bragð- og lyktarskyn aftur. Þá sagðist hann einnig glíma við þreytu sem er meðal algengustu eftirkasta sjúkdómsins.
Líkt og alþjóð veit greindist Víðir með Covid-19 í lok nóvember á síðasta ári eftir að smit kom upp í nærumhverfi hans. Hans nánasta samstarfsfólk auk Ölmu Möller, landlæknis og Þórólfs Guðnasonar, sóttvarnalæknis fóru í sóttkví og í sýnatöku. Sýni þeirra allra reyndust neikvæð.
Um tveimur vikum eftir að Víðir smitaðist kom í ljós að hann væri komin með lungnabólgu. Hundruð Íslendinga þjást enn af eftirköstum.
