„Ég held þetta sé al­ger­lega búið spil“

„Ég held að þetta sé al­ger­lega búið spil með þetta sak­laus uns sekt sannast í okkar sam­fé­lagi og við þurfum að fara að endur­hugsa það allt frá grunni.“

Þetta segir Jakob Bjarnar, blaða­maður Vísis, en nokkuð ljóst er að þar ræðir hann á­kvörðun Hag­kaupa og birgja um að taka markaðs­efni með Gylfa Þór Sigurðs­syni, knatt­spyrnu­manni, niður. Frétta­blaðið greindi fyrst frá málinu.

„Ekki þarf annað en kvitt á Twitt og þá rjúka fyrir­tæki og stofnanir til og setja við­komandi í hvers kyns straff með ó­fyrir­séðum af­leiðingum. Þar til annað kemur í ljós?! (Vel að merkja og það ætti auð­vitað ekki að þurfa að taka það fram, að ég er vita­skuld ekki að taka neina af­stöðu til sann­leiks­gildis orð­róms og ó­líkra á­sakana því um það get ég auð­vitað ekkert vitað frekar en flestir,)“ skrifar Jakob.

„Ég veit ekki hver á­byrgð þeirra er sem hlaupa til en um það má spyrja því víst er að þau fyrir­bæri eru með því að ausa olíu á þá elda sem loga glatt hjá dóm­stóli götunnar, því þetta er auð­vitað ekkert annað hvað svo sem Gunnar Ingi sá á­gæti lög­maður segir.“

Segir dóm­stól götunnar ekki til

Þó nokkrir leggja orð í belg, þar á meðal Lára Ómars­dóttir og Illugi Jökuls­son. „Það hefur aldrei verið til neitt sem heitir í al­vöru „sak­laus uns sekt er sönnuð“ meðal fólks. Fólk hefur frá örófi dæmt eða haft skoðun á öðru fólki og talað um það sín á milli. Það er ekki til neinn eigin­legur „dóm­stóll götunnar“ í raun hefur fólk líka alla tíð byggt á til­finningum og skoðunum sínum á öðru fólki og dæmt það,“ segir Lára.

„Það eina sem hefur breyst er að nú heyrast raddirnar víðar og fleiri raddir heyrast í einu en áður. Hér í den tíð hvíslaðist fólk á og jafn­vel hafði hátt og reifst í kaffi­boðum og þá eins og nú á­kváðu sum fyrir­tæki eða sumt fólk að taka af­stöðu strax. Annað fólk og önnur fyrir­tæki biðu á­tekta.“

Jakob svarar Láru þá og bendir á að dag­skrár­gerðar­maður Rásar 2 hafi neitað að spila lög með Ingó Veður­guð um helgina. „Það er refsing sem byggir á dómi dóm­stóls götunnar. Prinsippin í málinu breytast ekki þó ein­hverjum finnist þetta skíterí og tón­listin sem slík ekki við ein­hverra skap.“

Illugi leggur einnig orð í belg og segir: „Dóm­stóll götunnar“ er ekki góður frasi nema í um­ræðum mjög af léttara taginu. Í sögu­legu ljósi, þá VITUM VIÐ um ill­virki ó­tölu­legs grúa af fólki sem ekki hefur þó verið dæmt fyrir neinum dóm­stóli. Það hefur aldrei verið sannað fyrir rétti að Rómar­keisarar hafi (svo ég taki mér nær­tækt dæmi) níðst á hinum eða þessum á þennan eða hinn háttinn. Samt slá hinir virðu­legustu sagn­fræðingar því föstu.“