„Einhver hræðileg manneskja virðist vera að eitra fyrir vesalings kanínunum í Elliðaárdal. Í gærkvöldi fundust margar dauðar og hörmungin heldur áfram í dag; þær kveljast hræðilega og deyja.“
Þetta segir kona að nafni Helga á Facebook-síðu sinni en hún hefur ásamt öðrum gefið dýrunum skipulega yfir vetrartímann síðustu ár. Hún kveðst viss um að vægðarlaus hrotti hafi verið á ferð í Elliðarárdal og hafi drepið tugi kanína á svæðinu. Matvælastofnun hefur borist fjölda ábendinga og er með málið til skoðunar. Í gær voru 36 hræ hirt í dalnum og 15 í dag, alls rúmlega 50. Hafa hræin verið send til krufningar til að kanna hvort um sé að ræða sjúkdóm eða eitrun. Helga segir:
„Ég er búin að gefa þessum greyjum í mörg ár og græt þessa mannvonsku og miskunnarleysi. Hvílík grimmd og hvílíkur dauðdagi fyrir þær blessaðar sem hafa lifað af þennan harða vetur og betri tíð hefði átt að bíða þeirra á næsta leiti.“
Hefur því verið kastað fram að mögulega hafi kanínurnar drepist úr hungri. Það telur Helga fráleitt. Hún segir að einu sinni á dag fari einn úr hópnum, hvernig sem viðrar og gefi dýrunum. Það séu um 70 kanínur sem þiggi fæði frá hópnum. Um helgar og á góðviðrisdögum gerir fjölskyldufólk sér oft ferð í dalinn og gefi dýrunum að éta. Helga segir:
„Við höfum farið með sjáanlega veik eða slösuð dýr til dýralæknis og líka fundið heimili fyrir tvö. Þetta er áreiðanlega eitrun, því það stenst ekki að skyndilega deyi hópur þeirra í einu. Sársoltnir hrafnar, sem eru þarna í stórum stíl, hafa svo líklega ætlað að nota sér veik og deyjandi dýrin og kroppað í þau. Það hefur ekki verið góður biti.“
