„Ég byrja að stela af Visa kortinu hans, brjóta upp baukana hjá börnunum mínum og fór bara í alla vasa inni í húsinu. Ég bara varð að fá pening.“
Þetta segir Karítas Valsdóttir í viðtali í Íslandi í dag á Stöð 2 en Karítas er þriggja barna móðir sem er forfallinn spilafíkill sem misst hefur frá sér allt vegna fíknarinnar.
Í viðtalinu í Ísland í dag lýsir hún því hvernig hún fór fyrst í spilakassa úti í sjoppu þegar hún var einungis um tíu ára gömul. „Margir af krökkunum sem voru með mér í skóla tóku eftir þessu og byrjuðu að kalla mig spilafíkil og mér fannst það rosalega sárt og erfitt,“ segir Karítas í Íslandi í dag á Stöð 2 í gærkvöldi.
Karítas flutti til Bandaríkjanna eftir tíunda bekk. Þar lýsir Karítas því hvernig hún gat ekki komist í gegnum heilan dag án þess að spila og stal hún peningum úr sjálfsölum. Hún var á endanum send aftur til Íslands, þar flutti hún til ömmu sinnar, hóf að vinna og flutti inn til stráks.
„Ég varð mjög fljótt ólétt og var ég búin að ákveða það að ég myndi ekki spila þegar barnið kæmi. En ákvað að spila nægilega mikið þangað til og nota tímann. Þá vorum við bæði að spila. Við missum íbúðina og ég fæ að vera í bílskúrnum hjá frænku minni. Ég var þarna kasólétt og svaf á dýnu í bílskúrnum og í rauninni hefðum við alveg geta leigt, en þá hefðum við ekki getað spilað og við lögðum þetta á okkur til þess.“
Hún skildi við barnsföður sinn og flutti til pabba síns að nýju með kornabarn. Hún kynntist nýjum manni og lýsir því hvernig hún hafi horfið og skilið strák sinn eftir með manninum. „Ég hvarf í einhvern tíma og fór að spila. Svo kem ég aftur og hann var bara í sjokki. Þarna viðurkenni ég fyrir honum að ég væri spilafíkill,“ segir Karítas
Hún fór í meðferð á Vogi fyrir tæpum fjórum árum og er á góðum stað í dag. „Ég er dauðhrædd við að falla en eins og mér líður núna er það ekki inni í myndinni.“
Horfa má á viðtalið við Karítas í Ísland í dag frá því í gærkvöldi hér.
