Fórnarlamb Guðmundar Ellerts Björnssonar, sem var á miðvikudaginn dæmdur í fimm ára fangelsi í Landsrétti fyrir kynferðisbrot gegn börnum, sagðist í kvöldfréttum Stöðvar 2 hafa upplifað mikla reiði og depurð eftir að Guðmundur var fyrst sýknaður í héraði árið 2018.
Ungi maðurinn vill ekki koma fram undir nafni en hann greinir frá því að hann hafi verið dapur og reiður eftir niðurstöðu héraðsdóms. „Stuttu eftir þessa niðurstöðu þá var ég búin að ákveða mig að lífið væri búið. Hann fær bara að komast upp við þetta. Kerfið ætlar ekki að gera neitt í þessu og mér leið bara eins og enginn trúi því sem ég væri að segja þannig ég ákvað bara að reyna að enda líf mitt,“ sagði maðurinn í kvöldfréttum Stöðvar 2.
Guðmundur starfaði sem stuðningsfulltrúi hjá Barnavernd þegar hann var handtekinn en brotin náðu aftur til ársins 1998. Brotin gegn unga manninum voru mjög gróf og stóðu yfir frá átta til fjórtán ára aldurs.
Hefði verið hægt að koma í veg fyrir frekari brot
Málið vakti mikla athygli á sínum tíma en lögregla viðurkenndi að mistök hafi verið gerð í málinu þar sem ekki var brugðist við strax og fyrsta ákæran barst. Þá kom einnig í ljós að Reykjavíkurborg hafi fengið upplýsingar um brot mannsins árið 2008 en barnavernd hafi ekki verið tilkynnt um ábendinguna.
Greint var frá því í kvöldfréttum RÚV í gær að maðurinn sem Guðmundur braut gegn kæmi til með að krefjast bóta vegna mistakanna en Sævar Þór Jónsson, lögmaður mannsins, sagði að um erfiða baráttu fyrir réttlæti hafi verið að ræða.
Hann hafi fundið fyrir létti að Landsréttur hafi ákveðið að sakfella Guðmund en á sama tíma finni hann enn fyrir reiði þegar hann hugsar til þess að hægt hafi verið að koma í veg fyrir frekari brot.
„Mér leið vel en á sama tíma var þetta draumkennt, erfitt að trúa þessu.“
