Alexandra Briem, forseti borgarstjórnar og borgarfulltrúi Pírata, tjáði sig um orðróm þess efnis að Brynjar Níelsson, fyrrverandi þingmaður Sjálfstæðisflokksins, hygðist bjóða sig fram til formennsku í KSÍ. Hringbraut greindi frá því í kjölfar fréttar Fréttablaðsins og jós Alexandra úr skálum reiði sinnar á Facebook.
Er hún ekki ýkja sátt við mögulegt framboð Brynjars og þykir það greinilega ekki til þess fallið að auka traust til sambandsins eftir atburði síðustu vikna og mánaða: „Ef KSÍ ákveður að hætta alveg við að fara í nokkra einustu tiltekt í sínum málum, þá veit ég ekki um neina skýrari leið til að auglýsa það út á við,“ segir Alexandra.
Hún heldur áfram og kveður skýrt að orði: „Það að setja Brynjar í þessa stöðu væru mjög skýr skilaboð um að hætt hafi verið við að fara í einhverjar breytingar á hugarfari eða aðferðafræði.“
Edda Falak, fjármálafræðingur og samfélagsrýnir, tjáði sig einnig um mögulegt framboð Brynjars á Twitter. Þar deilir hún frétt þess efnis og segir einfaldlega: „hahahahahahahaha nei?“
Hún bætir við og ítrekar: „hahah bara nei, alveg alls ekki.“
Edda hefur farið mikinn í umræðum um ýmsar birtingarmyndir ofbeldis síðan hún hóf að hasla sér völl í samfélagsumræðunni hér á landi. Þá hefur hlaðvarp hennar, Eigin konur, notið mikilla vinsælda og tekið á ýmsum samfélagsmálum. Ljóst er að Eddu þykir mögulegt framboð Brynjars ekki heillavænlegt.
hahahahahahahaha nei?https://t.co/ivBpmI0AzU
— Edda Falak (@eddafalak) October 18, 2021
