Leikkonan Edda Björgvinsdóttir er búin að fá nóg af þeim sem komast upp með að gaspra um að einkabíllinn eigi forgang allsstaðar.
Edda, sem búsett er í miðbænum, er talskona þess að gera göngugötum hærra undir höfði og deildi hún viðtali Mannlífs við Ólaf Örn Ólafsson, veitingamann og rekstaraðila í miðbænum, sem birtist um helgina. Í viðtalinu sagði Ólafur Örn:
„Fjölmiðlaumfjöllun um skipulagsbreytingar í miðbænum gefur oft til kynna að það séu allir rekstraraðilar í bænum sammála um að það sé allt glatað hérna í bænum. En það er ekkert svoleiðis. Miðbærinn hefur aldrei verið eins líflegur og núna. Ég get alveg fullyrt það,“ sagði hann en Ólafur er einn eigenda Vínstúkunnar Tíu sopar.
Ólafur sagðist vera þeirrar skoðunar að neikvæð umfjöllun um miðbæinn væri að fæla fólk frá því að heimsækja hann. „Hér er mikil líf og fjör og ég er orðinn þreyttur á að það sé verið að tala mitt uppáhaldssvæði í borginni niður,“ sagði hann.
Edda er þakklát Ólafi fyrir að stíga fram og benda á hið augljósa, eins og hún orðar það í færslu á Facebook-síðu sinni. „Mannlíf er fegurra og bissniss blómstrar núna í miðbænum! Allar rannsóknir nágrannalanda okkar sýna að með göngugötum færist líf í dauð svæði, verslun eykst og fólk safnast saman í gleði. Það er óþolandi "Trumpismi" að lítill hópur skuli komast upp með gaspur um að einkabíllinn eigi forgang - allsstaðar! Það er árið 2020 núna og mengun einkabílsins á ekki rétt á sér.“
Edda hefur áður tjáð sig um miðborgina og er hún staðföst í þeirri skoðun sinni að einkabíllinn eigi ekki að njóta forgangs. „Stærstur hluti íbúa á höfuðborgarsvæðinu vill minnka mengandi bílaumferð og búa til fleiri göngugötur. Hversu langt er hægt að ganga í heimskulegu bulli? Reynsla um allan heim sýnir að göngugötur laða að fólk og efla verslun. Allsstaðar! Hér í miðbænum okkar hefur ALDREI verið jafn blómlegt mannlíf og nú. Það er löngu liðin tíð að heimta forgang einkabílsins,“ sagði hún í lok maí eins og Hringbraut fjallaði um.
