Leikkonan og handritshöfundurinn Edda Björgvinsdóttir skrifar hjartnæma kveðju til Gísla Rúnars Jónassonar leikara, rithöfund og þýðanda á Facebook í dag en Gisli hefði orðið sjötugur í dag.
„Lífsförunautur minn, besti vinur, ástin í lífi mínu, sálufélagi og marg verðlaunaður fjölskyldufaðir Gísli Rúnar Jónsson, fæddist þennan dag fyrir 70 árum. Það er ekki hægt að lýsa þessum manni í fáum orðum en hann var stórveldi bæði í lífinu og listinni,“ skrifar Edda.
„Elsku Gísli minn það verður fjölskylduveisla í kvöld þér til heiðurs þar sem ástvinir þínir munu gleðjast, hlæja, gráta og fagna lífinu saman. Þegar ég sit hér og skrifa þessi fátæklegu orð til þín, sakna ég þess svo að geta ekki beðið þig kíkja yfir textann og benda mér á hvað betur megi fara, eins og ég gat alltaf gert þegar ég var að setja einhvern texta á blað og var í tilfinningalegu uppnámi,“ bætir Edda við og deilir einstaklega skemmtilegum myndum af sér og Gísla í gegnum tíðna.
Gísli rúnar lést 28. júlí 2020, 67 ára að aldri en hann hóf sinn feril sinn sem skemmtikraftur í sjónvarpi með Júlíusi Brjánssyni í Kaffibrúsakörlunum, 1972-73, og lék síðan í, leikstýrði og skrifaði fjölda útvarps- og sjónvarpsþátta.
„Ég velti líka fyrir mér í dag, hver eigi að hringja í okkur öll til að og kanna hvort við séum ekki örugglega í góðum gír. Þú sagðir svo oft við mig í kvöld-símtölunum okkar „Ég var að tala við öll börnin okkar, hringdi í Evu og Björgvin og náði svo í Margréti og m.a.s. svaraði Róbert símanum “ Síðasta símtalið sem ég átti við þig var svo dýrmætt. Þú varst á leiðinni að leita þér hjálpar við þessum ósýnilegu sjúkdómum sem fæstir skilja. Fúsleiki þinn til að takast á við það sem hrjáði þig var ótrúlegur. Þú þráðir svo heitt að ná tökum á lífinu og gerðir bókstaflega allt til að til að geta notið fjölskyldunnar sem þú elskaðir meira en allt. Ég rígheld í þá hugsun að þú sért núna með blöðrur og köku á bleiku skýji að fagna með öllum sem við elskum á himnum. Ég veit að þú kíkir svo aðeins á okkur í kvöld og allir fá knús,“ skrifar Edda að lokum.
