Edda Björgvinsdóttir, ein ástsælasta leikkona þjóðarinnar, er mjög ósátt við Sjúkratryggingar Íslands eftir að greint var frá því að Hjúkrunarheimilið Lundur á Hellu hefði neyðst til að taka 20 milljóna króna yfirdrátt vegna COVID-kostnaðar, launahækkana og vanreiknaðra daggjalda.
RÚV fjallaði um þetta mál á fimmtudag.
Málið stendur Eddu nokkuð nærri enda hefur Edda unnið á umræddu hjúkrunarheimili í sjálfboðastarfi. Faðir hennar, Björgvin Magnúsdóttir flutti á heimilið ekki alls fyrir löngu og þá er dóttir hennar, Margrét ýrr Sigurgeirsdóttir hjúkrunarforstjóri.
Edda deildi frétt RÚV á Facebook-síðu sinni á fimmtudag og sagði:
„Hvað í andsk.... á það að þýða að koma svona fram við okkar elsta og viðkvæmasta fólk!!!!??'??? Hvernig voga æðstu valdamenn/konur hjá Sjúkratryggingum Íslands að hundsa öll erindi frá þessum hjúkrunarheimilum?? Það vill svo til að ég VEIT um öll bréfin og fyrirspurnirnar frá þessu tiltekna hjúkrunarheimili á Hellu - fyrirspurnir um stöðu á leiðréttingu svika Sjúkratrygginga Íslands, alveg frá því í janúar í fyrra . Erindum sem er enn ósvarað. Í rúmt ár!“
Í frétt RÚV sagði Margrét Ýrr að hjúkrunarheimilið væri að fá röng daggjöld vegna mistaka í skráningu árin 2017 og 2018. Heimilið væri því langt undir í daggjöldum. Allt árið 2020 hefði verið beðið eftir svörum um leiðréttingu en ekkert borist.
Edda hélt áfram:
„Það er sem sagt ekki látið svo lítið að svara fyrirspurnum. Bara þögn. Og svo þóttafull vörn þegar loksins fjölmiðlar upplýsa ruddaskap þessarar opinberu stofnunar: "Við höfum ekki fengið öll gögn ... blablabla" Hvaða gögn vantar? frá hverjum? Er ofverk stjórnenda Sjúkratryggina Íslands að svara þeim sem eru í forsvari fyrir hjúkrunarheimilin?? Er það til of mikil mælst?“
Edda spurði loks hversu lengi ætti að pína hjúkrunarheimili landsins og hversu mörgum starfsmönnum ætti að neyða stjórnendur til að segja upp. „Hvenær er gamla fólkið okkar hreinlega í hættu vegna þess að það er ekki hægt að greiða hjúkrunarfólki laun? Ég er brjáluð!“
Edda skrifaði svo öllu yfirvegaðri færslu í gærmorgun þar sem hún varpaði ljósi á stöðu föður síns.
„Ég á 97 ára gamlan föður sem verður 98 ára í haust og í Covid ástandinu þegar leikhúsið mitt lokaði skráði ég mig sem sjálfboðaliða á hjúkrunarheimilinu Lundi þar sem hann dvelur. Einangraði mig frá restinni af heiminum til að vera með honum og öllum hinum gleðigjöfunum á staðnum. Upplifunin var einstök. Kærleiksumönnun á heimsmælikvarða frá yfirburða starfsfólki. Ég veit að þið eigið mörg aðstandendur sem njóta svipaðrar umönnunar, þ.e. þurfa sökum aldurs og/eða sjúkdóma að dvelja á hjúkrunarheimilum.“
Edda segir að okkar öldruðu höfðingjar eigi skilið allt hið besta og „AÐEINS“ það allra besta. Ef greiðslur eru skertar sé í rauninni verið að þvinga stjórnendur til að segja upp starfsfólki.
„Öðruvísi er ekki hægt að spara. Ég veit hvað það þýðir að þurfa að segja upp fólki vegna þess að það kreppir svo skóinn fjárhagslega að úr blæðir. Það er ömurlegt. Hræðilegt! Það þýðir einfaldlega að duglegt fólk missir lífsviðurværi sitt og starfsfólkið sem eftir er þarf að bæta á sig vinnu. Á endanum getur það ekki meir. Hvað finnst því fólki sem hefur völdin ásættanlegt að hrekja marga stjórnendur og heilbrigðisstarfsmenn frá völdum með því að svelta reksturinn þannig að fólk hreinlega gefst upp? Á tyllidögum montum við okkur af frábæru heilbrigðiskerfi - ég mæli með að einstaka stofnanir fái ekki að rústa því sem við höfum byggt upp.“
