„Það er ágætt að fólk geri sér grein fyrir hættunni. Það má ekki líta af þeim í aðstæðum sem þessum,“ segir Kolbeinn Helgi Kristjánsson, eigandi hvolpsins Brútusar Kormáks sem gerði sér þann óleik um helgina að gleypa öngul þegar Kolbeinn tók hann með sér í veiði.
Dýralæknum hjá Dýralækninum í Mosfellsbæ tókst að bjarga lífi Brútusar, sem er aðeins sex mánaða, með sex klukkustunda aðgerð á sunnudagskvöld, en um tíma var tvísýnt um það hvort Brútus myndi lifa aðgerðina af.
„Hann er allur að koma til. Að vísu ósáttur með þennan skerm sem hann þarf að vera með, en annars er hann farinn að gelta á ókunnuga og með almenn leiðindi – sem betur fer,“ segir Kolbeinn og hlær. „Þetta leit þokkalega út til að byrja með en eftir tvo til þrjá tíma fengum við símtal þar sem okkur var sagt að það væri ekkert víst að hann myndi hafa þetta af.“
Kolbeinn var í veiði um helgina þegar bróðir hans tók eftir því að Brútus hafði gleypt öngul. Tilraunir til gefa honum trefjaríkt fæði til að hann gæti losað sig sjálfur við öngulinn gerðu ekki gagn og þá voru góð ráð dýr. „Þetta var alveg pikkfast,“ segir hann.
Kolbeinn segir að dýralæknarnir sem björguðu lífi Brútusar eigi allt hrós skilið. „Þetta eru algjörar kraftaverkakonur þarna. Þær voru þarna þrjár til fjórar sem komu að þessu á sunnudagskvöldi. Miklar hetjur að bjarga einum kærum fjölskyldumeðlim.“
Kolbeinn vill líka minna fólk á mikilvægi þess að tryggja dýrin, en aðgerðin sem Brútus gekkst undir kostaði um hálfa milljón króna. Hann hrósar TM fyrir að hringja 10 mínútum eftir að þeir fengu tölvupóst og græja þetta. Í færslu sem hann skrifaði um málið á Facebook-síðu sína minnir hann einnig á mikilvægi þess að hafa augu með dýrunum sínum.
„Ágætt að minna á þetta því ég gerði mér enga grein fyrir því hvað þetta getur verið stórt mál og ég hef ekki séð neina umræðu um þetta. Segir sig sjálfsagt sjálft en manni finnst einhvern veginn eðlilegt að hafa hundinn lausan á bakkanum með sér og býst ekki við því að það séu svona miklar hættur á bakkanum.“
