Lögreglan á Suðurlandi rannsakar nú hvarf 63 ára Íslendings sem hefur verið saknað í meira en eitt og hálft ár. Lögreglan lýsti eftir manninum, Sean Aloysius Marius Bradley, þann 23. mars síðastliðinn bæði hér á landi og hjá Interpol.
Ítarlega er fjallað um málið í Fréttablaðinu í dag.
Sean er fyrrverandi fiðluleikari hjá Sinfóníuhljómsveit Íslands og er fjölskylda hans búsett í Bretlandi. Heimildir Fréttablaðsins herma að vinir hans á Íslandi hafi hvatt fjölskylduna til að láta lýsa eftir honum.
Málið er allt hið dularfyllsta því fyrir hvarfið hafði hann verið í samskiptum við vini sína hér á landi á samfélagsmiðlum. Tjáði hann þeim að hann hefði farið til Spánar með íslenskri vinkonu sinni.
„Það síðasta sem við heyrðum af honum, þá var hann á Spáni. Hann sagðist vera kominn í búdda-klaustur að stunda íhugun, hann hefði það gott og við ættum að láta hann í friði,“ segir vinkona hans í samtali við Fréttablaðið og bætir við að þetta hafi komið þeim sem þekktu hann í opna skjöldu. „Við höfum saknað hans í nokkur ár,“ segir hún einnig.
Sean var flughræddur og forðaðist það mjög að stíga upp í flugvél.
Oddur Árnason, yfirlögregluþjónn hjá lögreglunni á Suðurlandi, segir lögregluna ekki geta staðfest að Sean hafi farið til Spánar. Hann átti bókað flug í tiltekna vél til Spánar og flugsætið var notað en lögreglan vill ekki staðfesta að það hafi verið hann sem notaði sætið. Þá hefur ekkert sést til hans á Spáni.
Oddur segir málið vera skrýtið í heild sinni.
„Hann hafði verið í sambandi við einstaklinga hér heima og þetta virðist hafa verið mikil skyndiákvörðun að fara, ef hann hefur farið. Mér finnst málið bara allt skrýtið. Ekkert þetta eitthvað umfram annað,“ segir Oddur.
Nánar er fjallað um málið á vef Fréttablaðsins.
