Í stað þess að fagna fertugsafmæli eiginmanns síns, Ríkharðs Arnar Steingrímssonar, um borð í skemmtiferðaskipi við Bahamaeyjar, eins og ráðgert var, sigldi Iðunn Dögg Gylfadóttir ásamt ungum sonum þeirra tveimur frá skipinu, með eiginmann sinn og föður þeirra í líkpoka.
Iðunn segir í viðtali við helgarblað Fréttablaðsins frá siglingunni sem breyttist í martröð þegar eiginmaður hennar og barnsfaðir varð bráðkvaddur fyrir framan hana og syni þeirra tvo, þá sex og níu ára gamla.
Þegar andlátið bar að var skemmtiferðaskipið í lögsögu Bahamaeyja, nóttina eftir átti svo að sigla til Miami. Vegna þessa þurfti Iðunn að fara af skipinu enda þurfti að ganga úr skugga um að ekki væri um sakamál að ræða, en fyrst komu lögreglumenn um borð til skýrslutöku.
Iðunn og Rikki eins og hann var kallaður kynntust í Lögreglunni þar sem bæði störfuðu og segir hún bakgrunn sinn sem lögreglumaður hafa hjálpað, hún þekkti ferlið og undraðist það ekki.
„Ég fann líka virðinguna sem hann fékk sem kollegi,“ segir hún.
Það er allt farið hvort eð er
Iðunn og drengirnir voru færð yfir í lítinn bát sem flutti þau yfir á næstu eyju.
„Ég hélt að Rikki færi með öðrum bát en hann var alltaf með, bara í líkpoka eins og hver annar farangur.“
Þegar komið var á eyjuna tók við ferðalag á fjórhjólum yfir hana, þaðan á spíttbát yfir á næstu eyju, þar sem tók við bið á lögreglustöð og í framhaldi flugferð til Nassá, höfuðborgar Bahamaeyja.
Móðirin, synirnir tveir og faðirinn í líkpoka.
„Í þessari pínulitlu rellu sem við flugum í, var honum troðið á ganginn á milli sæta okkar, þetta var súrrealískt,“ rifjar hún upp.
„Ég man eftir að hafa horft á sprungnar rúður vélarinnar og hugsað með mér: Já, já, við deyjum þá bara líka, það er allt farið hvort sem er.“
Viðtalið við Iðunni birtist í heild sinni í helgarblaði Fréttablaðsins sem kemur út á morgun, laugardag.